আসন্ন লোকসভা নিৰ্বাচনৰ বাবে অসমত কংগ্ৰেছে ৫টা সমষ্টিৰ প্ৰথমখন তালিকা প্ৰকাশ কৰাৰ পাছত এইবাৰ ৰাজ্যখনৰ আন চাৰিটা গুৰুত্বপূৰ্ণ সমষ্টিৰ বাবে প্ৰাৰ্থী চূড়ান্ত কৰিছে। কংগ্ৰেছে দেওবাৰে মাজনিশা দলটোৰ এই চাৰিটা সমষ্টিত প্ৰাৰ্থিত্ব চূড়ান্ত কৰে।
দ্বিতীয় পৰ্যায়ত প্ৰাৰ্থী চূড়ান্ত কৰা চাৰিটা সমষ্টি হ’ল নগাঁও, মঙলদৈ, লখিমপুৰ আৰু তেজপুৰ। সেই মতে নগাঁৱত প্ৰদ্যৎ বৰদলৈ, মঙলদৈত ভুৱনেশ্বৰ কলিতা, লখিমপুৰত অনিল বৰগোঁহাই আৰু তেজপুৰত এম জি কে ভানুক প্ৰাৰ্থিত্ব প্ৰদান কৰা হৈছে।
অৱশ্যে, নিখিল ভাৰত কংগ্ৰেছ সমিতিয়ে এতিয়াও আনুষ্ঠানিকভাৱে এওঁলোকৰ প্ৰাৰ্থিত্বৰ কথা ঘোষণা কৰা নাই।
উল্লেখযোগ্য যে যোৱা ১৫ তাৰিখে কংগ্ৰেছে অসমৰ ৫টা সমষ্টিৰ বাবে প্ৰথমখন প্ৰাৰ্থীৰ তালিকা প্ৰকাশ কৰিছিল।
প্ৰথমখন তালিকাত কৰিমগঞ্জত স্বৰূপ দাস, শিলচৰত সুস্মিতা দেব, কলিয়াবৰত গৌৰব গগৈ, যোৰহাটত সুশান্ত বৰগোঁহাই আৰু ডিব্ৰুগড়ত পৱন সিং ঘাটোৱাৰক দলে প্ৰাৰ্থিত্ব প্ৰদান কৰে।
