শ্ৰী শ্ৰী কমলাবাৰী সত্ৰৰ বৰবায়ন, সত্ৰীয়া সংস্কৃতিৰ সাধক টংকেশ্বৰ হাজৰিকালৈ আগবঢ়োৱা হৈছে ড° জগন্নাথ মহন্ত স্মাৰক বঁটা।
ড° জগন্নাথ মহন্ত সোঁৱৰণী মঞ্চই এইবছৰৰ পৰা আগবঢ়াবলৈ লোৱা বঁটাটো সত্ৰীয়া শিল্পীগৰাকীক সোমবাৰে সন্ধিয়া শিৱসাগৰৰ আমগুৰিত প্ৰদান কৰে শ্ৰীমন্ত শংকৰদেৱ কলাক্ষেত্ৰৰ প্ৰাক্তন সচিব তথা সত্ৰীয়া শিল্পী শাৰদী শইকীয়াই।
“ড° জগন্নাথ মহন্তৰ দৰে সত্ৰীয়া নৃত্য, গীত, বাদ্যৰ ব্যৱহাৰিক আৰু তাত্ত্বিক পাণ্ডিত্যৰ অধিকাৰী ব্যক্তিয়ে জীৱিত কালত প্ৰাপ্য সন্মান নাপালে,” আমগুৰিৰ বঁটা প্ৰদান অনুষ্ঠানটোত এই মন্তব্য কৰে শইকীয়াই।
প্ৰয়াত মহন্তৰ সান্নিধ্যত সত্ৰীয়া নৃত্যৰ শিক্ষা লাভ কৰা শইকীয়াই কয় যে মহন্তৰ “সত্ৰীয়া ডান্সেচ অৱ আচাম” গ্ৰন্থখন সত্ৰীয়া নৃত্যৰ সকলো অধ্যাপক আৰু শিক্ষাৰ্থীয়ে অধ্যয়ন কৰা উচিত।
বৰ বায়ন টংকেশ্বৰ হাজৰিকাই প্ৰয়াত মহন্তলৈ সংগীত নাটক অকাডেমিৰ বঁটা আগ নবঢ়োৱাত অসন্তুষ্টি প্ৰকাশ কৰে।
যোৱা ১৬ আৰু ১৭ মাৰ্চত দুদিনীয়া কাৰ্য্যসূচীৰে মঞ্চই আমগুৰি নাট্য মন্দিৰত জগন্নাথ মহন্ত স্মৃতি দিৱস আৰু বঁটা প্ৰদান অনুষ্ঠানটোৰ আয়োজন কৰিছিল।
১৭ মাৰ্চৰ সন্ধিয়া উদযাপন সমিতিৰ সম্পাদক ইন্দ্ৰকমল ফুকনে আঁত ধৰা বঁটা প্ৰদান অনুষ্ঠানত ড° জগন্নাথ মহন্তৰ প্ৰতিচ্ছবিৰ সন্মুখত বন্তি প্ৰজ্জ্বলন কৰে তিতাবৰ কমলাবাৰী সত্ৰৰ বৰ বায়ন পৰমানন্দ কাকতীয়ে।
পূৱেৰুণ শিল্পী সমাজ আমগুৰি, কৰাপাট, ড° জগন্নাথ মহন্ত ইন্সটিটিউট অৱ পাৰফৰ্মিং আৰ্ট আৰু স্থানীয় একাংশ ৰাইজৰ সহযোগত আয়োজিত অনুষ্ঠানটোত বিশিষ্ট অতিথিৰূপে উপস্থিত থাকে যোৰহাট সত্ৰীয়া সংগীত মহাবিদ্যালয়ৰ অধ্যক্ষ সাৰংগপাণি বৰদলৈ। অনুষ্ঠানত প্ৰয়াত মহন্তৰ সহধৰ্মিনী অঞ্জনা মহন্ত, ড° জগন্নাথ মহন্ত সোঁৱৰণী মঞ্চৰ সভাপতি অনিল কুমাৰ শইকীয়া, উদযাপন সমিতিৰ সভাপতি দিগন্ত বৰুৱাও উপস্থিত থাকে।
অনুষ্ঠানটোৰ লগত সংগতি ৰাখি আয়োজন কৰা সাংস্কৃতিক সন্ধিয়া মুকলি কৰে জাঁজী হেমনাথ শৰ্মা মহাবিদ্যালয়ৰ অৱসৰপ্ৰাপ্ত অধ্যক্ষ অনিল কুমাৰ গগৈয়ে।
