সমগ্ৰ ৰাজ্যৰ লগতে নগাঁৱতো তথ্য আৰু জনসংযোগ বিভাগৰ লগতে পঞ্চায়ত আৰু গ্ৰামোন্নয়ন বিভাগৰ নিযুক্তিত সংঘটিত অনিয়ম আৰু কেলেংকাৰী সন্দৰ্ভত আজি সদৌ অসম ছাত্ৰ সন্থাৰ নগাঁও জিলা সমিতিয়ে বিক্ষোভ কাৰ্যসূচী ৰূপায়ণ কৰে।
নগাঁও জিলা ছাত্ৰ সন্থাৰ সভাপতি আৰু সাধাৰণ সম্পাদকৰ নেতৃত্বত শতাধিক ছাত্ৰ সন্থাৰ কৰ্মী আৰু সমৰ্থকে বিক্ষোভ কাৰ্যসূচী ৰূপায়ণ কৰে। প্ৰতিবাদকাৰী সকলে ‘নিযুক্তিত দুৰ্নীৰ্তি, অনিয়ম বন্ধ কৰক, দুৰ্নীৰ্তিযুক্ত নিযুক্তিৰ তদন্ত কৰক, অসম চৰকাৰ হায় হায়, সৰ্বানন্দ সোণোৱাল হায় হায়, শূন্য সহনশীলতাৰ প্ৰতিশ্ৰুতি ক’ত গ’ল’ আদি প্ৰতিবাদী শ্ল’গানেৰে পৰিৱেশ উত্তাল কৰি তোলে।
বিক্ষোভৰ অন্তত প্ৰতিবাদকাৰী সকলে উক্ত দুয়োটা বিভাগতে হোৱা দুৰ্নীতিৰ তদন্তৰ দাবী জনাই জিলা উপায়ুক্তৰ জৰিয়তে মুখ্য মন্ত্ৰীলৈ স্মাৰকপত্ৰ প্ৰেৰণ কৰে।
লগতে অতি শীঘ্ৰে তদন্তৰ জৰিয়তে নিযুক্তিত হোৱা কেলেংকাৰীত জড়িতক দোষীক উচিত শাস্তি বিহিবলৈ দাবী জনায়।