গুৱাহাটীত থকা ‘মাডাৰ অ’ল্ড এজ হ’মত’ আজি উপস্থিত হয় অসমৰ জনপ্ৰিয় কণ্ঠশিল্পী অংগৰাগ পাপন মহন্ত। কণ্ঠশিল্পীগৰাকী উপস্থিত হোৱাৰ লগে লগে মাডাৰ অ’ল্ড এজ হ’মৰ আবাসী সকলে ফুলেৰে স্বাগতম জনায়।
প্ৰায় আঢ়ৈ ঘণ্টা আবাসী সকলৰ লগত কটায় আবেগিক হৈ পৰে পাপন। বহাগ বিহুৰ পূৰ্বে তেওঁ আইতা সকলৰ কাৰণে নতুন কাপোৰ লৈ আহি সকলোকে মাজত বিতৰণ কৰে আৰু বহু সময় ধৰি আবাসী সকলৰ লগত তেওঁলোকৰ স্মৃতি ৰোমন্থন কৰে। প্ৰতিদান স্বৰূপে আইতা সকলেও মৰমৰ শিল্পী জনক গোলাপ ফুলৰ থোপা, শৰাই আৰু চুমাৰে সম্বৰ্ধনা জ্ঞাপন কৰে। বহু কেইগৰাকী আইতাই নিজ হাতেৰে মিঠাইয়ো খুৱাই পাপনক।
আনহাতে, অসমলৈ আহি আইতা সকলৰ মাজত সময় কটাব পাই যথেষ্ট সুখী বুলি মন্তব্য কৰে পাপনে। সকলোৰে কাৰণে আটকধুনীয়াকৈ সজাই পৰাই ৰখা পৰিবেশত তেওঁ বহুকেইটা গানো গুণগুণাই। আইতা সকলেও পাপনৰ সুৰৰ লগত সুৰ মিলাই বিহু গীত গায়।
উল্লেখযোগ্য যে, গুৱাহাটীত থকা মাডাৰ অল্ড এজ হ’মে দীৰ্ঘদিন ধৰি ঘৰ আৰু সমাজত আলৈ অথানি হোৱা বৃদ্ধা মহিলা সকলক সেৱা আগবঢ়াই আহিছে।
