অন্ধবিশ্বাস আৰু কু-সংস্কাৰৰ বিৰুদ্ধে দীৰ্ঘদিন ধৰি যুঁজ দি অহা মানৱ অধিকাৰ তথা সমাজকৰ্মী দিব্যজোতি শইকীয়াক শনিবাৰে অৰ্থাৎ ৩০ মাৰ্চত সত্ৰ মহাসভাই সম্বৰ্ধনা জ্ঞাপন কৰে। অসম সত্ৰ মহা সভা আৰু দুলীয়াজান আঞ্চলিক সমিতিৰ উদ্যোগত আয়োজিত ‘সেতুবন্ধ ২০১৮-১৯’ অনুষ্ঠানত সম্বৰ্ধনা জনোৱা হয় মুখ্য অতিথি হিচাপে উপস্থিত থকা শইকীয়াক।
সত্ৰ মহাসভাৰ ভদ্ৰকান্ত ডেকাৰ সভাপতিত্বত অনুষ্ঠিত হোৱা উক্ত অনুষ্ঠানত সম্বৰ্ধনা গ্ৰহণ কৰি দিব্যজ্যোতি শইকীয়াই কয়, ‘বৰ্তমান সময়ত ধৰ্মক লৈ একাংশই বৃহৎ ব্যৱসায় চলাইছে। আন একাংশই ধৰ্মৰ নামত সন্ত্ৰাসবাদী কাৰ্য্য কলাপত লিপ্ত হৈছে।‘
ইফালে ভাষণ প্ৰসংগতে বৰ্তমানৰ বিজেপি চৰকাৰকো সমালোচনা কৰি শইকীয়াই কয় যে, ‘৫৫০ বছৰ পূৰ্বে শংকৰদেৱে প্ৰতিষ্ঠা কৰি যোৱা গণতান্ত্ৰিক ব্যৱস্থাক বৰ্তমানৰ শাসক যন্ত্ৰই ভাঙি তচনচ কৰিলে। ইয়াৰ পৰা সাৰি যোৱা নাই গণতন্ত্ৰৰ চতুৰ্থ স্তম্ভ সংবাদ মাধ্যমো।‘
ইয়াৰোপৰি তেওঁ ‘সেতুবন্ধ’ৰ অৰ্থ বাখ্যা কৰি কয় যে ভিন্ন জাতি-জনগোষ্ঠীৰ মাজত সামাজিক আৰু সাংস্কৃতিক সমন্বয় আৰু সদভাৱ স্থাপন কৰাই হৈছে সেতুবন্ধ। আমি শংকৰদেৱৰ আদৰ্শক অনুকৰণ কৰি ভিন্ন জাতি-জনগোষ্ঠীৰ মাজত সমন্বয় স্থাপন কৰিব নোৱাৰিলে সুস্থ সমাজ গঢ় দিয়াত কঠোৰ পৰিস্থিতিৰ সন্মুখীন হ’ব লাগিব।‘
উল্লেখযোগ্য যে যোৱা ৩০ মাৰ্চৰ পৰা দুলীয়াজান কেন্দ্ৰীয় নামঘৰৰ প্ৰাঙ্গনত অনুষ্ঠিত হৈ থকা ‘সেতুবন্ধ’ কাৰ্য্যসূচীৰ কাইলৈ অন্তিম দিন।
