উত্তৰ-পূবক অস্থিৰ কৰি তোলা তথা খিলঞ্জীয়া লোকৰ অস্তিত্বৰ প্ৰতি ভাবুকি কঢ়িয়াই অনা নাগৰিকত্ব সংশোধনী বিধেয়ক প্ৰসংগত প্ৰথমবাৰৰ বাবে স্পষ্টকৈ মুখ খুলিছে কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱে। সোমবাৰে এক সংবাদমেলত মন্ত্ৰীগৰাকীয়ে অৰুণাচলৰ লগতে উত্তৰ-পূবৰ বিশেষ ৰাজ্যৰ মৰ্যাদা থকা ৰাজ্যক এই বিধেয়কখনৰ পৰা আঁতৰাই ৰাখিব বুলি ঘোষণা কৰে।
সংবাদমেলতে ৰিজিজুৱে কয় যে উত্তৰ-পূবৰ বিভিন্ন দল-সংগঠন, বিজেপিৰ সহযোগী দলৰ লগতে অৰুণাচলৰ মুখ্য মন্ত্ৰী পেমা খাণ্ডুৱেও উক্ত বিধেয়কখনৰ বিৰোধিতা কৰিছিল। উত্তৰ-পূবৰ ঐক্যবদ্ধ আন্দোলনৰ প্ৰতি লক্ষ্য ৰাখিয়েই বিজেপি চৰকাৰে বিলখন ৰাজ্যসভাত উত্থাপন নকৰিলে।
তেওঁ লগতে নৰেন্দ্ৰ মোদী নেতৃত্বাধীন বিজেপি চৰকাৰে অৰুণাচল তথা উত্তৰ-পূবৰ লোকসকলৰ ভাষা-সংস্কৃতি তথা অস্তিত্বৰ প্ৰতি ভাবুকি আনিব পৰা কোনো কামেই নকৰে বুলিও মন্ত্ৰীগৰাকীয়ে মন্তব্য কৰে।
‘উত্তৰ-পূবত কেবৰ বিৰুদ্ধে প্ৰতিবাদে তীব্ৰতৰ ৰূপ ধাৰণ কৰিছিল যদিও দেশৰ বিভিন্ন প্ৰান্তৰ পৰা এই বিধেয়কখন শীঘ্ৰে বলবৎ কৰিব লাগে বুলিও চৰকাৰৰ ওপৰত হেচা প্ৰয়োগ কৰি আছে। গতিকে বিজেপিয়ে বিধেয়ক গৃহীত কৰিলেও ইয়াৰ পৰা আঁতৰাই ৰাখিব উত্তৰ-পূবক’। এইদৰে কয় কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱে।
উল্লেখ্য যে যোৱাবাৰৰ দৰে এইবাৰো কেন্দ্ৰীয় গৃহ ৰাজ্য মন্ত্ৰী কিৰেন ৰিজিজুৱে আগন্তুক লোকসভা নিৰ্বাচনত অৰুণাচল পশ্চিম লোকসভা সমষ্টিৰ পৰা প্ৰতিদ্বন্দ্বিতা আগবঢ়াব। ইফালে তেওঁৰ বিৰুদ্ধে কংগ্ৰেছে প্ৰাৰ্থিত্ব প্ৰদান কৰিছে বৰ্ষীয়ান নেতা তথা ৰাজ্যখনৰ প্ৰাক্তন মুখ্য মন্ত্ৰী নাবাম টুকীক। দুই হাই প্ৰফাইল নেতাৰ মাজত হ’ব লগীয়া এই যুঁজখনত সকলোৰে দৃষ্টি নিবদ্ধ হৈ থাকিব।
