ভাৰত চৰকাৰৰ হেঁচাত সংঘবদ্ধভাৱে সন্দেহজনক আৰু ৰাজনৈতিক পোষ্ট দিয়া বুলি সন্দেহ কৰা কিছুমান পেইজ, একাউণ্টৰ ওপৰত ফেইচবুকে কঠোৰ ব্যৱস্থা লোৱাৰ এদিন পিছতে ইয়াৰ জনপ্ৰিয় মেছেজিং এপ হোৱাটছএপেও ভুৱা খবৰৰ ক্ষেত্ৰত সতৰ্কতামূলক পথ ল’বলৈ আগ বাঢ়িছে।
আজি হোৱাটছএপ কৰ্তৃপক্ষই জানিবলৈ দিয়ামতে, য়ুজাৰে লাভ কৰা বাৰ্তা এটাৰ বিশ্বাসযোগ্যতা পৰীক্ষা কৰিব পৰাকৈ তেওঁলোকে এটা চে’কপইণ্ট টিপলাইন (checkpoint tipline) মুকলি কৰিছে।
চৰকাৰে ছ’চিয়েল মিডিয়া প্লেটফ’ৰ্মবোৰক আগন্তুক নিৰ্বাচনত প্ৰভাৱিত কৰাৰ যিকোনো ধৰণৰ প্ৰয়াস কৰিলে কঠোৰ ব্যৱস্থাৰ মুখামুখি হ’বলৈ সকীয়নি দিয়াৰ পিছত ফেইচবুক আৰু হোৱাটছএপৰ এদিনৰ অগাপিছাকৈ এই তৎপৰতা।
“PROTO নামৰ ভাৰত-ভিত্তিক এটা মিডিয়া স্কিল ষ্টাৰ্ট আপৰ দ্বাৰা মুকলি কৰা এই টিপলাইনে নিৰ্বাচনৰ সময়ছোৱাত পৰ্য্যৱেক্ষণৰ বাবে চে’কপইণ্টৰ বাবে উৰা-বাতৰিৰ এটা ডেটাবেইছ প্ৰস্তুত কৰাত সহায় কৰিব। এই প্ৰকল্পটোক হোৱাটছএপৰ দ্বাৰা পৃষ্ঠপোষকতা আৰু প্ৰযুক্তিগতভাৱে সহায় কৰা হৈছে”, হোৱাটছএপ কৰ্তৃপক্ষই এটা ঘোষণাত আজি কয়।
আজিৰ পৰা আৰম্ভ কৰা এই চে’কপইণ্টলৈ ভাৰতৰ য়ুজাৰসকলে লাভ কৰা ভুল বাতৰি বা উৰা-বাতৰি +91-9643-000-888 নম্বৰৰ জৰিয়তে প্ৰেৰণ কৰিব পাৰিব।
য়ুজাৰ এজনে এটা সন্দেহজনক খবৰ টিপলাইনৰ সৈতে শ্বেয়াৰ কৰিলে PROTO-অৰ পৰীক্ষাকেন্দ্ৰই সঁহাৰি দিয়াৰ চেষ্টা কৰিব আৰু য়ুজাৰজনক তেওঁ শ্বেয়াৰ কৰা বাৰ্তাটোত দাবী কৰা কথাখিনি পৰীক্ষিত হয় নে নহয় জনাব।
“য়ুজাৰক দিয়া সঁহাৰিত সংশ্লিষ্ট বাৰ্তাটোত থকা তথ্যবোৰ সত্য, অসত্য, ভ্ৰান্তিজনক, বিতৰ্কমূলক বা ‘ক’ব পৰা নাযায়’ এনেকুৱা ইংগিত থাকিব”, হোৱাটছএপৰ ঘোষণাটোত এইদৰে কোৱা হয়।
ছবি, ভিডিঅ’ লিংক, টেক্সট –এইকেইটা ফৰ্মেটত থকা বিষয়বস্তু পৰীক্ষা কৰিব পৰাকৈ কেন্দ্ৰটো প্ৰযুক্তি-সুবিধাযুক্ত। ইংৰাজীৰ উপৰি হিন্দী, তেলুগু, বেংগালী আৰু মালয়ালম ভাষাৰ বিষয়বস্তু পৰীক্ষা কৰিব পৰা হ’ব।
ভাৰতত হোৱাটছএপৰ ২০ কোটিৰো অধিক য়ুজাৰ আছে আৰু সৰ্বাধিক সংখ্যক য়ুজাৰ থকা দেশবিলাকৰ ভিতৰত অন্যতম।
কোৱা প্ৰয়োজন, ভাৰত চৰকাৰৰ পৰা পোৱা হেঁচাৰ বাবে হোৱাটছএপ কৰ্তৃপক্ষই যোৱা বছৰ একোটা মেছেজ এবাৰত সৰ্বাধিক ৫জনলৈ প্ৰেৰণ কৰিব পৰা নিয়ম কৰি ব্যাপক হাৰত বাৰ্তা বিলোৱাৰ সুবিধাটো সীমিত কৰিছিল।
একেবাৰতে বহুতো য়ুজাৰলৈ বাৰ্তা প্ৰেৰণ কৰিব পৰা সুবিধাটোৰ বহুতে অপব্যৱহাৰ কৰাৰ অভিযোগ আছিল আৰু ভাৰতত সংঘটিত কেইবাটাও অসামাজিক ঘটনাৰ কাৰক হিচাপে ইয়াক চিহ্নিত কৰা হৈছিল। তাৰ পিছতে চৰকাৰৰ হেঁচাত সীমিতকৰণৰ সিদ্ধান্তটো লৈছিল কৰ্তৃপক্ষই।
