নাগৰিকত্ব বিধেয়ক বিৰোধিতাক অন্যতম মূল বিষয়ৰূপে লৈ শুকুৰবাৰে লোক সভা নিৰ্বাচনৰ ইস্তাহাৰ মুকলি কৰিছে এ আই য়ু ডি এফে।
অসমৰ তিনিটা সমষ্টিত প্ৰাৰ্থিত্ব আগবঢ়োৱা দলটোৰ গুৱাহাটী হাতীগাওঁস্থিত মুখ্য কাৰ্য্যালয়ত ইস্তাহাৰখন উন্মোচন কৰে সাধাৰণ সম্পাদক আমিনুল ইছলামে।
বিজেপি প্ৰস্তাৱিত বিধেয়কখন প্ৰতিৰোধ কৰাক আগস্থান দি অসম চুক্তিৰ আধাৰত অবৈধ বিদেশী অনুপ্ৰৱেশকাৰীক বহিষ্কাৰৰ পদক্ষেপ লোৱাৰ আশ্বাস দিছে দলটোৱে।
“নাগৰিকত্ব সংশোধনী বিধেয়ক আইনবিৰোধী, সংবিধানবিৰোধী আৰু অসম স্বাৰ্থৰ বিৰোধী। দলৰ সভাপতি মৌলানা বদৰুদ্দিন আজমলে সংসদত এক বলিষ্ঠ ভূমিকা লৈছিল।”, ইস্তাহাৰ মুকলি কৰি মন্তব্য ইছলামৰ।
তেওঁ লগতে কয় যে বিজেপিয়ে চৰকাৰ গঠন কৰিব পাৰিলে জুলাই মাহত বিধেয়কখন পুনৰ আনিব বুলি ঘোষণা কৰিছে, গতিকে এ আই য়ু ডি এফে ইয়াৰ বিৰোধিতা কৰি যাব।
চাহ শ্ৰমিকৰ মজুৰিৰ প্ৰসংগও এ আই য়ু ডি এফে ইস্তাহাৰত স্থান দিছে। বাগিচাৰ শ্ৰমিকসকলৰ দীৰ্ঘদিনীয়া দাবী, যেনে- মজুৰি বৃদ্ধি, মাটি পট্টা আদিৰ ক্ষেত্ৰত বিজেপিয়ে কোনো ব্যৱস্থা গ্ৰহণ নকৰি এতিয়া কেৱল কিছুমান নিৰ্বাচন কেন্দ্ৰিক আঁচনিহে হাতত লৈছে বুলিও দলটোৱে মন্তব্য কৰে। ইয়াৰ বিপৰীতে এ আই য়ু ডি এফে এই সমস্যাসমূহ সমাধানৰ বাবে চৰকাৰক হেঁচা প্ৰয়োগ কৰাৰ আশ্বাস দিয়ে।
একেদৰে চৰাঞ্চলত জৰীপ চলাই বাসিন্দাসকলৰ মাটি পট্টা প্ৰদানৰ পোষকতা কৰে দলটোৱে। “এই জৰীপতেই চৰ-চাপৰিত থকা অবৈধ অনুপ্ৰৱেশকাৰীসকল ওলাই পৰিব।”, ইছলামে কয়।
ইস্তাহাৰত এ আই য়ু ডি এফে দুৰ্নীতি প্ৰতিৰোধ, বানপানী খহনীয়া সমস্যা, উগ্ৰপন্থী সমস্যাৰ ৰাজনৈতিক সমাধান, পৰ্যটনৰ বিকাশ, নিবনুৱা সমস্যা সমাধান, কৃষি ক্ষেত্ৰৰ বিকাশ আদি বিষয়সমূহো উল্লেখ কৰিছে।
নগাওঁ আৰু কাছাৰৰ বন্ধ হৈ যোৱা কাগজ কলকে ধৰি ৰাজ্যৰ বহু কেইটা উদ্যোগৰ পুনৰুদ্ধাৰ প্ৰসংগও দলটোৱে উত্থাপন কৰিছে।
