গুৱাহাটী লোকসভা সমষ্টিৰ নিৰ্বাচনী প্ৰচাৰে ক্ৰমাৎ আকৰ্ষণীয় ৰূপ ল’বলৈ আৰম্ভ কৰিছে। ৰঙালী বিহুৰ মাজতে সমষ্টিটোৰ প্ৰাৰ্থীসকলে নিৰ্বাচনী প্ৰচাৰ তীব্ৰতৰ কৰি তুলিছে।
গুৱাহাটী লোকসভা সমষ্টিৰ অন্তৰ্গত কৃষ্ণাইত গীত মাতেৰে গুৱাহাটী সমষ্টিৰ নিৰ্দলীয় প্ৰাৰ্থী জোণমণি দেৱী খাউণ্ডে নিৰ্বাচনী প্ৰচাৰ চলায়।
শনিবাৰে সন্ধিয়া কৃষ্ণাইৰ খৰিধৰা বজাৰত এখন নিৰ্বাচনী প্ৰচাৰ সভাত অংশ গ্ৰহণ কৰি বিজেপি আৰু কংগ্ৰেছ দলৰ সমালোচনাত মুখৰ হৈ পৰে জোনমনি দেৱী খাউণ্ড। তেওঁ কয় যে কংগ্ৰেছ আৰু বিজেপিৰ কথাৰ ঠিক নাই। নিৰ্বাচনৰ আগত এটা আৰু নিৰ্বাচনৰ পাছত এটা কয়। বিগত সময়ছোৱাত দুয়োটা দলৰে প্ৰকৃত স্বৰূপ ৰাইজে দেখিলে। গতিকে দুয়োটা দলকে বিদায় দি জোণমণি দেৱী খাউণ্ডক ভোট দিবলৈ তেওঁ ৰাইজক আহ্বান জনায়।
বিজেপি,কংগ্ৰেছ শক্তিশালী কিন্ত প্ৰাৰ্থী দুয়োগৰাকীয়ে শক্তিশালী নহয় বুলি উল্লেখ কৰি খাউণ্ডে কয়,’’ বিজেপি-কংগ্ৰেছ দুটা ডাঙৰ দল যদিও দুয়োটা দলে এই সমষ্টিত এজন যোগ্য প্ৰাৰ্থী দিব নোৱাৰিলে।‘’
জোণমণি খাউণ্ডে নিজৰ জয় নিশ্চিত বুলি দাবী কৰাৰ লগতে সহস্ৰাধিক লোকৰ উপস্থিতিত অনুষ্ঠিত হোৱা সভাখনত গীতৰ মাজেৰে ভোট বিচাৰে।
নিৰ্বাচনী প্ৰচাৰৰ বাবে কৃষ্ণাইত উপস্থিতি হোৱা প্ৰাৰ্থী গৰাকীয়ে আগন্তুক ২৩ এপ্ৰিলত কংগ্ৰেছ-বিজেপিক বিদায় দি ভোটাৰ ৰাইজক গণতন্ত্ৰ ৰক্ষাৰ বাবে ফুটবলৰ ছবিত ভোট দিবলৈ আহ্বান জনায়।
