নাগৰিকত্ব সংশোধনী বিধেয়কক লৈ বিজেপিৰ বিৰুদ্ধে ৰাজ্যখনত সৃষ্টি হোৱা প্ৰতিবাদী আন্দোলনৰ পাছত এইবাৰ লোকসভা নিৰ্বাচনত বিষয়টোৱে প্ৰভাৱ পেলোৱাৰ শংকা দূৰ কৰিবলৈ বিজেপি নেতাসকলে অতি কৌশলপূৰ্ণ স্থিতি গ্ৰহণ কৰিছে। আজি শিলচৰত বিজেপিৰ ৰাষ্ট্ৰীয় সাধাৰণ সম্পাদক ৰাম মাধৱে বিষয়টোক লৈ আন এক কৌশলী মন্তব্য আগবঢ়াইছে।
বিধেয়কখনৰ সন্দৰ্ভত প্ৰতিক্ৰিয়া প্ৰকাশ কৰি ৰাম মাধৱে কয়,‘’নাগৰিকত্ব বিধেয়কৰ বিৰোধ কৰাসকলৰ সৈতে আমি আলোচনা কৰিম। বিধেয়কখনে খিলঞ্জীয়া লোকৰ কোনো ক্ষতি নকৰে। ই থলুৱা জাতি-জনগোষ্ঠীৰ অধিকাৰ কোনোধৰণে খৰ্ব নকৰে।‘’
বিজেপিৰ ৰাষ্ট্ৰীয় নেতগৰাকীয়ে লগতে কয়,’’ কংগ্ৰেছ দলে বিধেয়কখনক লৈ অপপ্ৰচাৰ চলাই আহিছে। চূড়ান্ত এন আৰ চি প্ৰকাশ হোৱাৰ পাছতে বিধেয়কখন উত্থাপন কৰা হ’ব।‘’
তদুপৰি, ৰাম মাধৱে বহু চৰ্চিত তথামানৱ অধিকাৰ লংঘনৰ অভিযোগ উঠা ডিটেনশ্যন কেম্পসমূহ বন্ধ কৰাৰ সন্দৰ্ভত চিন্তা চৰ্চা কৰিব বুলিও সদৰী কৰে।
বালাকোটক লৈ বিৰোধীয়ে ৰাজনীতি কৰাৰ অভিযোগ তুলি বিজেপিৰ ৰাষ্ট্ৰীয় সাধাৰণ সম্পাদকগৰাকীয়ে কয় যে প্ৰধান মন্ত্ৰী নৰেন্দ্ৰ মোদীৰ বিকল্প নাই। তেওঁ লগতে ৰাইজৰ পৰা যথেষ্ট সহাঁৰি পোৱা বুলিও ব্যক্ত কৰে।
আনহাতে, বিজেপিৰ দিনতহে বৰাকত উন্নতি হোৱাৰ দাবী কৰি ৰাম মাধৱে কয়,’’ বিজেপি চৰকাৰৰ কামকাজ ৰাইজে দেখিছে। চৰকাৰৰ উন্নয়নমূলক কামৰ বাবে ৰাইজে পুনৰ বিজেপিক ভোট দিব।‘’
ইপিনে, শিলচৰৰ সাংসদ সুষ্মিতা দেবৰ সমষ্টিবাসীৰ বাবে কেতিয়াও সময় নহ’ল বুলি উল্লেখ কৰি কংগ্ৰেছে এআইয়ুডিএফৰ হাত ধৰি নিৰ্বাচনত জিকাৰ চেষ্টা চলোৱা বুলি মন্তব্য কৰে ৰাম মাধৱে।
