বিশ্বনাথ বন সংমণ্ডলৰ বনৰক্ষী বিষয়া ৰাজু গগৈৰ নেতৃত্বত এটা বন কৰ্মীৰ দল আৰু গহপুৰ আৰক্ষী এছ টি এফে চলোৱা যুটীয়া অভিযানত আজি ৰাতিপুৱা গহপুৰৰ কুখ্যাত গঁড় চিকাৰী দ্বীপেন পেগু(৩৫)ক কৰায়ত্ত কৰিবলৈ সক্ষম হয়।
উল্লেখ্য যে যোৱা ৮ এপ্ৰিলত গহপুৰৰ লখৰাচাপৰিত উদ্ধাৰ হোৱা গঁড়টোৰ হত্যাকাণ্ডত দীপেন পেগু জড়িত আছিল। কিয়নো ১৭ এপ্ৰিলত বনৰক্ষীয়ে উদ্ধাৰ কৰা থ্ৰী নট থ্ৰী ৰাইফলটো দ্বীপেন পেগুৰ বুলি বন বিষয়াৰ আগত স্বীকাৰ কৰে।
ইয়াৰ উপৰি আটকাধীন চোৰাং চিকাৰীজনে আৰু কেইবাটাও গঁড় হত্যাত জড়িত থকাৰ কথা প্ৰকাশ কৰে। জানিব পৰা মতে যোৱা ১৬ ফেব্ৰুৱাৰিত অগৰাতলিত সংঘটিত গঁড় হত্যাতো প্ৰত্যক্ষভাৱে জড়িত আছিল দ্বীপেন পেগু।
প্ৰায় দুবছৰৰ পৰা পলাতক অৱস্থাত থকা ধৃত চোৰাং চিকাৰী দ্বীপেন পেগুক জেৰা কৰাৰ পিছত গঁড়ৰ চোৰাং চিকাৰী চক্ৰৰ সন্দৰ্ভত বহু তথ্য পোহৰলৈ অহাৰ সম্ভাৱনা আছে বুলি বন বিষষা ৰাজু গগৈয়ে জানিবলৈ দিয়ে।
