নগাঁও-লাওঁখোৱা-নলতলী পথত মঙ্গলবাৰে সংঘটিত এক শোকাৱহ পথ দুৰ্ঘটনাত এটি এবছৰীয়া কন্যা শিশুই প্ৰাণ হেৰুৱা ঘটনাই সমগ্ৰ অঞ্চলটোতে শোকাকুল পৰিবেশৰ সৃষ্টি কৰিছে।
প্ৰাপ্ত তথ্য মতে আজি পুৱা প্ৰাতঃভ্ৰমণলৈ ওলাই অহা সোমা ঘোষ (৩৫) নামৰ মহিলা গৰাকীয়ে নিজৰ এবছৰীয়া ভতিজী অম্বিশা ঘোষক কোলাতলৈ দুই লেন যুক্ত উক্ত পথত খোজকাঢ়ি থকাৰ অৱস্থাত ৰূপহীহাটৰ ভকতগাঁৱৰ সমীপত নগাঁও দিশৰ পৰা তীব্ৰ বেগেৰে অহা এখন অচিনাক্ত গাড়ীয়ে খুন্দিয়াই দুয়োকে গুৰুতৰভাৱে আহত কৰে।
আহত দুয়োকে ততাতৈয়াকৈ ৰূপহী আদৰ্শ চিকিৎসালয়ত ভৰ্তি কৰোৱা হয় যদিও চিকিৎসকে তেওঁলোকক উন্নত চিকিৎসাৰ বাবে নগাঁৱও অসামৰিক চিকিৎসালয়লৈ প্ৰেৰণ কৰে। আনহাতে পৰিয়ালৰ লোকে দুয়োকে নগাঁৱলৈ নি থকাৰ পথতে অতি সংকটজনক অৱস্থাত থকা কণমানি শিশুটিৰ মৃত্যু হয়।
ইফালে দূৰ্ঘটনা সংঘটিত কৰিয়েই ঘটনাস্থলীৰ পৰা নলতলী দিশে পলায়ন কৰা বাহনখনক বিচাৰি ৰূপহীহাট আৰক্ষীয়ে অনুসন্ধান চলাই আছে যদিও বাতৰি লিখা সময়লৈকে বাহনখনৰ সন্ধান উলিয়াবলৈ সক্ষম হোৱা নাই।
