নগাঁও-কাৰ্বিআংলং সীমান্তত এতিয়া সঘনাই সংঘটিত হ’বলৈ ধৰিছে বিভিন্ন ধৰণৰ অপৰাধমূলক ঘটনা। কিছুদিন পূৰ্বে চামগুৰিৰ কঠালগুৰিত হাতে হাতে মাৰাণাস্ত্ৰ লৈ দুৰ্বৃত্তৰ এটা দলে ডকাইতি কাণ্ড সংঘটিত কৰাৰ পাছতেই পুনৰ শনিবাৰে নিশা আন এক চাঞ্চল্যকৰ ডকাইতি কাণ্ড সংঘটিত হয় নগাঁও কাৰ্বিআংলং সীমান্তত।
চামগুৰি সমীপৱৰ্তী আঞ্জুপানী আৰক্ষী চকীৰ অতি দুৰ্গম পাহাৰীয়া এলেকা পানীমুৰাৰ স্থানীয় বাসিন্দা যুবৰাজ বে’ নামৰ লোকজনৰ ঘৰত নিশা ডকাইতৰ এটা দলে অৰ্তকিতে প্ৰৱেশ কৰি এক লোমহৰ্ষক ডকাইতি কাণ্ড সংঘটিত কৰে। হাতত মৰাণাস্ত্ৰ লৈ প্ৰৱেশ কৰা ডকাইতৰ দলটোৰ আক্ৰমণত যুৱৰাজ বে’ নামৰ লোকজন গুৰুতৰভাৱে আহত হয়।
ইয়াৰোপৰি যুৱৰাজ বে’ৰ ঘৰৰ ভিতৰতেই হস্তনিৰ্মিত বন্দুকেৰে গুলীচালনা কৰি ডকাইতৰ দলটোৱে ভয়-ভাবুকি দিয়াৰ চেষ্টা কৰে। পাছত ডকাইতৰ দলটোৱে যুৱৰাজ বে’ৰ ঘৰৰ পৰা এখন এল্ট’ বাহন বলপূৰ্বক ভাবে কাঢ়িলৈ উধাও হয়। লগতে দলটোৱে লোকজনৰ ঘৰৰ পৰা লুটি নিয়ে এল চি ডি, সাঁচতীয়া ধনকে ধৰি যাৱতীয় সা-সম্পত্তি।
পৰৱৰ্তী সময়ত নিশা ডকাইতৰ দলটোৰ সৈতে চামগুৰি আৰক্ষীৰ মুখামুখি সংঘৰ্ষ হোৱাত ডকাইতৰ দলটোৱে এল্ট’খন এৰি পলায়ন কৰে। সম্প্ৰতি এল্ট’খন চামগুৰি আৰক্ষীৰ জিম্মাত আছে।
উল্লেখযোগ্য যে চামগুৰি আৰু আঞ্জুপানীৰ দৰে দুখন আৰক্ষী থানা থকাৰ পাছতো চামগুৰিৰ লগতে ইয়াৰ পাশ্বৱৰ্তী অঞ্চলসমূহত এনেধৰণৰ ঘটনা সঘনাই সংঘটিত হোৱাত ইয়াক লৈ তীব্ৰ চৰ্চা চলিছে।
