যৌন নিৰ্যাতনৰ গোচৰত দেশৰ মুখ্য ন্যায়াধীশ ৰঞ্জন গগৈক আভ্যন্তৰীণ তদন্ত কমিটিয়ে ক্লীনশ্বিট দিয়াৰ এদিন পাছতেই উচ্চতম ন্যায়ালয়ৰ বাহিৰত মঙলবাৰে আৰক্ষীয়ে ১৪৪ ধাৰা জাৰি কৰে।
মঙলবাৰে ৰাতিপুৱাৰে পৰা এদল অধিবক্তা মহিলা সমাজকৰ্মীয়ে উচ্চতম ন্যায়ালয়ৰ সন্মুখত এক প্ৰতিবাদ সাব্যস্ত কৰিছিল।
আনহাতে, আৰক্ষীয়ে সমবেত প্ৰতিবাদকাৰীসকলক অঁতৰাই পঠিয়াবলৈ চেষ্টা কৰাৰ সময়তে পৰিস্থিতি নিয়ন্ত্ৰণৰ বাহিৰলৈ যায়। তদুপৰি, এই প্ৰতিবাদৰ বাতৰি সংগ্ৰহ কৰিবলৈ যোৱা কেইগৰাকীমান সাংবাদিককো আৰক্ষীয়ে আটক কৰিছিল।
প্ৰতিবাদৰ বাতৰি সংগ্ৰহ কৰিবলৈ যাওঁতে আটক কৰা সাংবাদিক কেইগৰাকীক মুকলি কৰি দিলেও আৰক্ষীয়ে ৩০গৰাকী মহিলা সামাজিক কৰ্মীক দিল্লীৰ মন্দিৰ মাৰ্গ আৰক্ষী থানাত আটক কৰি ৰখা বুলি জানিব পৰা গৈছে।
ইতিমধ্যে উচ্চতম ন্যায়ালয়ৰ চৌহদত নিৰাপত্তা ব্যৱস্থা বৃদ্ধি কৰি তোলা হৈছে।
বাতৰি অনুসৰি, কেইবাগৰাকীও সামাজিক কৰ্মী আৰু অধিবক্তাৰ এটা দলে দেশৰ মুখ্য ন্যায়াধীশ ৰঞ্জন গগৈৰ বিৰুদ্ধে উত্থাপিত যৌন নিৰ্যাতনৰ গোচৰটোৰ সন্দৰ্ভত ন্যায়াধীশ এছ এ ববদেৰ নেতৃত্বৰ তিনিজনীয়া ন্যায়াধীশৰ কমিটিখনে গ্ৰহণ কৰা প্ৰক্ৰিয়াটোৰ বিৰুদ্ধে প্ৰতিবাদ কৰিছিল।
প্ৰতিবাদকাৰীসকলে জানিবলৈ দিয়া মতে দেশৰ মুখ্য ন্যায়াধীশ ৰঞ্জন গগৈক ক্লীনশ্বিট দিয়া উচ্চতম ন্যায়ালয়ৰ আভ্যন্তৰীণ তদন্ত কমিটিখনে গ্ৰহণ কৰা পদ্ধতিটোৰ ওপৰত প্ৰশ্ন তুলি প্ৰতিবাদটো সাৱ্যস্ত কৰা হৈছিল। তেওঁলোকে দেশৰ মুখ্য ন্যায়াধীশগৰাকীৰ বিৰুদ্ধে পূৰ্বতে যৌন নিৰ্যাতনৰ অভিযোগ তোলা উচ্চতম ন্যায়ালয়ৰ প্ৰাক্তন মহিলা কৰ্মচাৰীগৰাকীয়ে এক সুবিচাৰ পোৱাটো বিচাৰে বুলিও সদৰী কৰে।
উল্লেখযোগ্য যে সোমবাৰে দেশৰ মুখ্য ন্যায়াধীশগৰাকীৰ বিৰুদ্ধে উত্থাপিত যৌন নিৰ্যাতনৰ অভিযোগ সন্দৰ্ভত গঠিত তিনিজনীয়া ন্যায়াধীশৰ কমিটিখনে বিষয়টো সম্পৰ্কত ৰঞ্জন গগৈক ক্লীনশ্বিট দিছিল।
আনহাতে, মহিলাগৰাকীয়ে পূৰ্বে আভ্যন্তৰীণ তদন্ত কমিটিখনৰ প্ৰক্ৰিয়াটোত ভীতিগ্ৰস্ত হৈ অংশগ্ৰহণ নকৰাৰ সিদ্ধান্ত লৈছিল। সোমবাৰৰ ৰায়টোৰ পাছত প্ৰাক্তন মহিলা কৰ্মচাৰীগৰাকীয়ে কৈছিল যে তেওঁৰ শংকা সঁচা হ’ল আৰু তেওঁৰ ন্যায় লাভৰ আশা সম্পূৰ্ণ ধূলিস্যাৎ হৈ পৰিল।
