গুৱাহাটী উচ্চ ন্যায়ালয়ৰ ৰায়ক বৃদ্ধাংগুষ্ঠ দেখুৱাই ৮ মে’ত অসম বন্ধ ঘোষণা কৰিছিল অসম মুছলিম স্বায়ত্ব শাসিত পৰিষদ দাবী সমিতি (সুৰক্ষা সমিতি) নামৰ এক ধৰ্মীয় সংখ্যালঘু সংগঠনে। ইয়াৰ নেতৃত্বত আছিল সংগঠনটোৰ সভাপতি তথা প্ৰাক্তন বিধায়ক ৰচুল হক বাহাদুৰ।
কিন্তু বিধান সভাৰ সন্মানীয় আসনত অধিষ্ঠিত হৈ যোৱা, আদালতৰ ৰায়ক আৱমাননা কৰা নেতাগৰাকীৰ ঘোষণাক সমৰ্থন নজনালে সাধাৰণ ৰাইজে। ফলত সফল নহ’ল প্ৰাক্তন বিধায়কগৰাকীৰ নেতৃত্বত আহ্বান দিয়া ধৰ্মীয় সংখ্যালঘু সংগঠনটোৰ ‘অসম বন্ধ’।
যোৱা ৬ মে’ত দিচপুৰ প্ৰেছ ক্লাৱত এখন সংবাদমেল অনুষ্ঠিত কৰি সংগঠনটোৱে ‘বিশ্বনাথ কাণ্ড’, বিধায়ক প্ৰশান্ত ফুকনৰ শেহতীয়া মন্তব্য আৰু শিলাদিত্য দেবে বিভিন্ন সময়ত কৰি অহা মুছলমান বিৰোধী বক্তব্যৰ প্ৰতিবাদত ৮ মে’ত পুৱা ৫ বজাৰ পৰা ১২ ঘন্টীয়া ‘অসম বন্ধ’ৰ ঘোষণা কৰিছিল। কিন্তু ‘বন্ধৰে সমস্যাৰ সমাধান নহয়’ বোলা কথাষাৰক যেন সাৰোগত কৰি সৰ্বসাধাৰণ নাগৰিকে বন্ধ পালনৰ পৰা বিৰত থাকিল।
অসমৰ আন ঠাই নালাগে ধৰ্মীয় সংখ্যালঘু অধ্যুষিত অঞ্চলতো কোনো প্ৰভাৱ নপৰিল এই বন্ধৰ। যি কথাই মুছলমানৰ বাবে স্বায়ত্ব শাসিত পৰিষদৰ দাবী কৰা তথাকথিত সংগঠনটোৰ গণভিত্তি কিমান তাকো স্পষ্ট কৰিলে।
সংগঠনটোৰ সভাপতিগৰাকীয়ে কেৱল বন্ধ ঘোষণা কৰাই নহয়, ২৩ মে’ত লোকসভা নিৰ্বাচনৰ ফলাফল ঘোষণা হ’লে যদি বিজেপিৰ ফলাফল বেয়া হয় তেতিয়া দলটো মুছলমান সমাজৰ প্ৰতি অধিক আক্ৰমণাত্মক হৈ পৰিব পাৰে বুলিও সন্দেহ ব্যক্ত কৰিছিল। যি কথাই এক বিশেষ শ্ৰেণীৰ লোকৰ মনত শংকা আৰু আৰু সন্দেহৰ ভাৱ আনিব পাৰে বুলি ভৱাৰ থল আছে।
কিন্তু এনে বিতৰ্কিত মন্তব্যৰে চৰ্চাত থাকিব খোজা নেতাক সাধাৰণ নাগৰিকে যে প্ৰশ্ৰয় দিব নিবিচাৰে সেয়া তেওঁৰ ঘোষণাৰ প্ৰতি ৰাইজৰ অসহযোগেই আকৌ এবাৰ প্ৰমাণ কৰিলে।
