ৰাজ্যত এন আৰ চিৰ দাবী-আপত্তি প্ৰক্ৰিয়া চলি থকা আৰু ইয়াকলৈ বিভিন্ন পক্ষৰ মাজত সৃষ্টি হোৱা প্ৰতিক্ৰিয়াৰ মাজতে শিৱসাগৰত এন আৰ চিৰ কামত নিয়োজিত এজন চৰকাৰী বিষয়া সন্ধানহীন হোৱাৰ ঘটনাই চাঞ্চল্যৰ সৃষ্টি কৰিছে।
সন্ধানহীন বিষয়াজন যোৰহাট জিলাৰ কাকজানৰ দিগন্ত শইকীয়া। তেওঁ জলসম্পদ বিভাগৰ শিৱসাগৰ সংমণ্ডলৰ সহকাৰী কাৰ্যবাহী অভিযন্তা হিচাপে কৰ্মৰত আছিল। প্ৰাপ্ত তথ্য মতে বুধবাৰে পুৱাৰ পৰা বিষয়াজন সন্ধানহীন হৈ আছে।
আনহাতে তেওঁক বিচাৰি আৰক্ষীয়ে তেওঁৰ চৰকাৰী আবাসগৃহত তালাচী চলাওঁতে এখন চুইচাইড নোট উদ্ধাৰ কৰে। আৰক্ষীৰ সূত্ৰ মতে উক্ত চুইচাইড নোটত বিষয়াগৰাকী মানসিকভাৱে উদ্বিগ্ন হোৱাৰ কথা প্ৰকাশ পাইছে।
চুইচাইড নোটত বিষয়া গৰাকীয়ে এন আৰ চিৰ কামত নিয়োজিত কোনো উচ্চপদস্থ বিষয়াৰ পৰা পোৱা ভাবুকি আৰু তীব্ৰ হেঁচাত নিজকে এই দায়িত্বৰ বাবে অযোগ্য বুলি উল্লেখ কৰি আত্মহত্যাৰ পথ বাচি লোৱাৰ কথা উল্লেখ কৰে।
অৱশ্যে প্ৰকৃততে বিষয়াজনে আত্মহত্যা কৰিলে নে শিৱসাগৰ এৰি আন কোনো স্থানত আশ্ৰয় লৈ আছে সেই কথা এতিয়ালৈকে স্পষ্ট হোৱা নাই। জিলা প্ৰশাসনে পত্ৰখন শিৱসাগৰ জিলাৰ আৰক্ষী অধীক্ষকক দিয়াৰ পিছত আৰক্ষীয়ে ঘটনাৰ সন্দৰ্ভত এটা গোচৰ পঞ্জীয়ন কৰি তেওঁক বিচাৰি অভিযান আৰম্ভ কৰিছে যদিও বৰ্তমানলৈকে সন্ধান উলিয়াবলৈ সক্ষম হোৱা নাই।
ইতিমধ্যে দিগন্ত শইকীয়াৰ পৰিয়ালৰ লোক শিৱসাগৰত উপস্থিত হৈছেহি। জিলা উপায়ুক্ত আৰু আৰক্ষী অধীক্ষকে শইকীয়াৰ চৰকাৰী আৱাসগৃহ পৰিদৰ্শন কৰিছে। শইকীয়া কেইবা বছৰ ধৰি এন আৰ চিৰ কামত নিয়েজিত আছিল।
উল্লেখযোগ্য যে উচ্চতম ন্যায়ালয়ে এন আৰ চিৰ চূড়ান্ত তালিকা অহা ৩১ জুলাইত প্ৰকাশৰ অন্তিম সময়সীমা নিৰ্ধাৰণ কৰি দিছে। ইয়াৰ মাজতে একাংশই খিলঞ্জীয়া লোকক বিদেশী সজাই দাখিল কৰিছে অভিযোগ। এনে পৰিস্থিতিত উচ্চপদস্থ বিষয়া দিগন্ত শইকীয়াক এন আৰ চি কাম লেহেমীয়া কৰা বুলি ভাবুকি প্ৰদান কৰাৰ বাবেই বিষয়াজনে মানসিক চাপত ভাগি পৰি এই সিদ্ধান্ত লোৱা বুলি বহুতে সন্দেহ কৰিছে।
