অসমৰ পৰা বহু ৰাজহুৱা প্ৰতিষ্ঠানৰ কাৰ্য্যালয় বহিঃৰাজ্যলৈ স্থানান্তৰণেৰে কেন্দ্ৰই উত্তৰ-পূবক প্ৰশাসনিকভাৱে পংগু কৰিব খোজা বুলি অভিযোগ উত্থাপন কৰিছে অসম সংগ্ৰামী মঞ্চই।
ভাৰতীয় তেল নিগমৰ অসম দিভিজনৰ কাৰ্য্যালয়টো নামত গুৱাহাটীত ৰাখি বাকী সকলো কাম-কাজ কলকাতালৈ স্থানান্তৰ কৰাৰ উদাহৰণ দি বৃ্হস্পতিবাৰে দলটোৱে এই মন্তব্য কৰিছে।
“১৯০১ চনত স্থাপন কৰা এ’চিয়াৰে প্ৰথম ডিগবৈ শোধানাগাৰৰ লগত জড়িত প্ৰশাসনিক তথা বিপণন বিভাগ কৰ্তৃপক্ষই অসমৰ পৰা পশ্চিমবংগৰ কলকাতালৈ লৈ যোৱাৰ পদক্ষেপ গ্ৰহণ কৰিছে,” এই সিদ্ধান্ত “কোনোপধ্যেই মানি ল’ব নোৱাৰি” বুলি উল্লেখ কৰি দলটোৰ সাধাৰণ সম্পাদক সমৰজ্যোতি বেজবৰুৱাৰ মন্তব্য।
বঞ্চনা বন্ধ কৰি উত্তৰ-পূৰ্বাঞ্চলৰ বাবে গুৱাহাটীত ভাৰতীয় তেল নিগমৰ আঞ্চলিক কাৰ্য্যালয় পূৰ্ণ ৰূপত প্ৰতিষ্ঠা কৰিবলৈ মঞ্চই দাবী জনাইছে।
আনহাতে অসমত শাখা থকা ১৬২টা বেংকৰ মাণ্ডলিক কাৰ্য্যালয়ো গুৱাহাটীৰ পৰা কলকাতালৈ স্থানান্তৰ কৰাৰ পদক্ষেপ গ্ৰহণ কৰিছে বুলিও বেজবৰুৱাই অভিযোগ তোলে।
তেওঁ লগতে কয় যে বেংকসমূহে অসমত বিনিয়োগত গুৰুত্ব দিয়া নাই আৰু অসমৰ পৰা জমা ধনৰ পুঁজি বহিৰ্গমন এক নিয়মত পৰিণত হৈছে।
“বেংক ব্যৱস্থাক ৰাজ্য চৰকাৰে ৰাজ্যখনৰ স্বাৰ্থত ব্যৱহাৰ কৰা নাই,” চৰকাৰৰ বিৰুদ্ধে তেওঁৰ অভিযোগ।
অসমৰ প্ৰাপ্য বহু কাৰ্য্যালয়ো কেন্দ্ৰীয় চৰকাৰে উদ্দেশ্যপ্ৰণোদিতভাৱে ৰাজ্যত প্ৰতিষ্ঠা কৰা নাই বুলিও তেওঁ অভিযোগ কৰে। “কেন্দ্ৰই অতি কৌশলেৰে এই কাম কৰিছে।”
দলটোৱে অ’ এন জি চিৰ “সৰ্বাধিক লাভজনক গেলেকী তৈলক্ষেত্ৰ” বহুজাতিক কোম্পানি শ্লাম বাৰ্জাৰক গতাই দিবলৈ গ্ৰহণ কৰা সিদ্ধান্তক তৎকালে বাতিলৰ দাবী জনাইছে।
তাৰোপৰি উত্তৰ পূৰ্বাঞ্চলৰ বাবে ভাৰতীয় জীৱন বীমা নিগমৰ এক মাণ্ডলিক কাৰ্য্যালয় স্থাপনৰো দাবী কৰে অসম সংগ্ৰামী মঞ্চই।
একেদৰে ২০১৪ চনৰ নিৰ্বাচনী প্ৰতিশ্ৰুতি পালন কৰি বিজেপি চৰকাৰক ৰাজ্যত ড’নাৰ কাৰ্য্যালয় স্থাপনৰ বাবেও তেওঁলোকে দাবী জনায়।
অহা আগষ্ট মাহৰ ভিতৰত উপৰোক্ত দাবীসমূহ পূৰণ নকৰিলে “আত্মনিয়ন্ত্ৰণৰ অধিকাৰৰ সংগ্ৰাম” গঢ়ি তোলাৰ অংগীকাৰ দিছে মঞ্চই।
