শিল্পীৰ মন উদাৰ, শিল্পীৰ মন বহল, শিল্পীৰ নাই কোনো জাতি কোনো ধৰ্ম। শিল্পী সকলোৰে বাবে সমান। তাৰে এক সুন্দৰ নিদৰ্শন শিৱসাগৰত দেখুৱাই থৈ গ’ল টিভি পৰ্দাৰ দুগৰাকী অসমীয়া জনপ্ৰিয় অভিনেতাই।
শনিবাৰে শিৱসাগৰৰ ডিমৌত এক অনুষ্ঠান পৰিবেশন কৰিবলৈ আহিছিল বেহাৰবাৰী আউটপষ্ট খ্যাত কে কে অৰ্থাৎ সিদ্ধাৰ্থ শৰ্মা আৰু মোহন অৰ্থাৎ দ্বীপজ্যোতি কেউট। তেওঁলোকৰ লগত আছিল দুই বন্ধু চাহিদ আৰু ইভেন্ট মেনেজাৰ উৎপল শৰ্মা।
তেওঁলোক সন্ধিয়া প্ৰায় ৫.৩০ বজাত শিৱসাগৰৰ এখন হোটেলত উপস্থিত হয়হি। লগে লগে কে কে আৰু মোহনে হোটেলৰ ৰান্ধনিশাললৈ যায় আৰু বন্ধু চাহিদৰ বাবে ইফটাৰিৰ প্ৰস্তুতি কৰে আৰু ঠিক ৫.৫২ বজাত হোটেলৰ ৰুমত চাহিদৰ বাবে ইফটাৰিৰ খাদ্য পৰিবেশন কৰে। বন্ধু চাহিদৰ ইফটাৰিৰ সহযোগী হৈ ধৰ্মীয় ৰীতিৰে ৰোজাৰ ব্ৰত ভাঙে।
আনহাতে, শনিবাৰে কে কে আৰু মোহনে নিৰামিষ খাদ্য গ্ৰহণ কৰে বাবে বন্ধু চাহিদৰ বাবেও ইফটাৰিত নিৰামিষ খাদ্যৰ ব্যৱস্থা কৰে। তেওঁলোকৰ লগত ইফটাৰিত আনজন বন্ধু উৎপল শৰ্মা আৰু শিৱসাগৰৰ সাংবাদিক বন্ধু মুস্তাফিজ আহমেদেও সহযোগিতা আগবঢ়ায়।
ইফটাৰিৰ অন্তত কে কে আৰু মোহনে কলে, “আমি প্ৰথমে অসমীয়া, তাৰ পাছতহে হিন্দু মুছলমান। এইখন সম্প্ৰীতিৰ অসম। আজি আমি আমাৰ বন্ধুৰ পবিত্ৰ ৰমজান মাহৰ ব্ৰত ভাঙি ইফটাৰি দিবলৈ পাই নিজকে গৌৰব অনুভৱ কৰিছো আৰু এই পবিত্ৰ মাহটোক সন্মান জনাইছো। অনাগত দিনত অসম এনে দৰেই থাকিব আৰু আমিও এনেদৰেই সম্প্ৰীতিৰ বাণী বিলাই থাকিম”।
