কোষাগাৰ বিষয়াৰ হেমাহিৰ বাবে অসম চৰকাৰৰ দীনদয়াল দিব্যাংগ আঁচনিৰ ধন হিতাধিকাৰীয়ে লাভ নকৰাৰ অভিযোগ তুলি আজি শতাধিক দিব্যাংগই মহানগৰীৰ বামুনীমৈদামৰ কোষাগাৰ প্ৰাধিকাৰীৰ কাৰ্য্যালায়ত প্ৰতিবাদ সাব্যস্ত কৰি উত্তপ্ত পৰিস্থিতি সৃষ্টি কৰে।
কাৰ্যালয়ৰ বাহিৰত প্ৰতিবাদ কৰিয়ে ক্ষান্ত নাথাকি প্ৰতিবাদকাৰী সকলে কাৰ্য্যালয়ৰ নিজৰ কোঠাত ঘেৰাও কৰে কোষাগাৰ প্ৰাধিকাৰী বিষয়াক। প্ৰতিবন্ধী সুৰক্ষা সমিতি, অসমৰ নেতৃত্বত অহা প্ৰতিবাদকাৰীসকলে অসম চৰকাৰৰ বিত্ত বিভাগৰ বিৰুদ্ধেও ক্ষোভ উজাৰে।
উল্লেখযোগ্য যে, বিগত ১০ জানুৱাৰিত মুখ্য মন্ত্ৰী সৰ্বানন্দ সোণোৱালে শ্ৰীমন্ত শংকৰদেৱ কলাক্ষেত্ৰত দিব্যাংগ সকলৰ বাবে দীনদয়াল দিব্যাংগ আঁচনি নামৰ এখন আঁচনি শুভাৰম্ভ কৰিছিল আৰু আঁচনিখন উদ্বোধন কৰাৰ দিনাই মুঠ ১,২২,১১৫ গৰাকী দিব্যাংগ লোকক আঁচনিখনৰ জৰিয়তে লাভ কৰিবলগীয়া ধন মোকলাই দিয়াৰ কথা আছিল যদিও তেওঁলোকে এই ধন লাভ কৰা নাছিল।
আঁচনিখনত উল্লেখ কৰা মতে, দিব্যাংগ সকলক চৰকাৰৰ তৰফৰ পৰা মাহিলি এহেজাৰ টকাকৈ আৰ্থিক অনুদান আগবঢ়োৱাৰ সিদ্ধান্ত গ্ৰহণ কৰা হৈছিল।
পৰৱৰ্তী সময়ত এপ্ৰিল মাহত পুনৰ ২৪,৬১৭ গৰাকী ব্যক্তিক আঁচনিখনৰ বাবে নিৰ্বাচিত কৰি অসম চৰকাৰৰ সমাজ কল্যাণ বিভাগে মুঠ ২৯,৫৪,১৬,০০০ টকা মোকলাই দিয়াৰ বাবে সিদ্ধান্ত গ্ৰহণ কৰে আৰু সেইমৰ্মে বিগত ৬ মাৰ্চতে ৩৭৫ আৰু ৩৯৫ নম্বৰ বিলযোগে ২১,৪৪,১৬,০০০ আৰু ১,৪৮,৩২,০০০ টকা মোকলাই দিবলৈ কোষাগাৰালৈ প্ৰেৰণ কৰে।
তদুপৰি, বিভাগে পুনৰ ৪১০ নম্বৰ বিলৰ জৰিয়তে ৬,৬১,৬৮,০০০ টকা মোকলাই দিবলৈ কোষাগাৰলৈ প্ৰেৰণ কৰে। কিন্তু সমাজ কল্যাণ বিভাগে কোষাগাৰলৈ বিল পঠিওৱাৰ দুমাহ উকলি যোৱাৰ পাছতো আজি পৰ্যন্ত দিব্যাংগ সকলে আঁচনিৰ এটকাও ধন লাভ কৰা নাই।
প্ৰতিবন্ধী সুৰক্ষা সমিতিৰ সাধাৰণ সম্পাদক নৃপেন মালাকৰে দিব্যাংগ সকলে প্ৰাপ্য ধন লাভৰ পৰা বঞ্চিত হোৱাৰ ক্ষেত্ৰত সমাজ কল্যাণ বিভাগৰ লগতে বিত্ত বিভাগৰো গাফিলতি আছে বুলি অভিযোগ কৰি তেওঁলোকে ঘোচ দিব নোৱাৰাৰ বাবেই বিল পেলাই থৈছে বুলি সংবাদ মাধ্যমৰ আগত কয়।
আনহাতে, কোষাগাৰৰ বিষয়াগৰাকীয়ে এই প্ৰতিবাদ সম্পৰ্কত দায় সৰা মন্তব্য কৰি দিব্যাংগ সকলৰ বিষয়টো হয়তো কামৰ হেচাৰ বাবে অলপ লেহেমীয়া হৈছে বুলি উল্লেখ কৰে।
