২৩ মে’ত প্ৰকাশ পোৱা লোকসভা নিৰ্বাচনৰ ফলাফলত বিজেপিয়ে সমগ্ৰ দেশত অভূতপূৰ্ব সফলতা লাভ কৰাৰ সমান্তৰালভাৱে উত্তৰ-পূবৰ ৰাজ্য অৰুণাচল প্ৰদেশৰ দুয়োখন আসনতে বিজয় সাব্যস্ত কৰিবলৈ সক্ষম হয়।
অৰুণাচলৰ দুখন লোকসভাৰ আখন অৰুণাচল পূব আৰু অৰুণাচল পশ্চিমত দুয়োগৰাকী বিজেপি প্ৰাৰ্থী ক্ৰমে টাপিৰ গাও আৰু কেন্দ্ৰীয় গৃহ ৰাজ্যিক মন্ত্ৰী কিৰেণ ৰিজিজু বিজয়ী হয়।
অৰুণাচল পূব সমষ্টিত বিজেপিৰ টাপিৰ গাৱে কংগ্ৰেছৰ ল’ৱাংচা ৱাংলাটক ৬৯.৯৪৮ টা আৰু অৰুণাচল পশ্চিমত ৰিজিজুৱে কংগ্ৰেছৰ নাবাম টুকীক ১,৫৪,৫৬১ টা ভোটৰ ব্যৱধানত পৰাস্ত কৰিবলৈ সক্ষম হয়।
অৰুণাচল পূব সমষ্টিত বিজেপি প্ৰাৰ্থীগৰাকীয়ে ভোটদান হোৱা মুঠ ২,৯৩,৭৮১ টা ভোটৰ ভিতৰত ৫২.৩৮ শতাংশ হাৰেৰে ১,৫৩,৮৮৩ টা ভোট লাভ কৰাৰ বিপৰীতে পৰাজিত কংগ্ৰেছ প্ৰাৰ্থীগৰাকীয়ে ২৮.৫২ শতাংশ হাৰেৰে মুঠ ৮৩,৯৩৫ টা ভোট লাভ কৰিবলৈ সক্ষময় হয়।
আনহাতে, অৰুণাচল পশ্চিম সমষ্টিত ভোটদান হোৱা মুঠ ৩,১৬,৮৭২ টা ভোটৰ ভিতৰত বিজেপিৰ বিজয়ী প্ৰাৰ্থী ৰিজিজুৱে ৬৩.৬২ শতাংশ হাৰেৰে মুঠ ২,০১,৬০২ টা ভোট লাভ কৰাৰ বিপৰীতে কংগ্ৰেছৰ পৰাজিত প্ৰাৰ্থী নবাম টুকীয়ে ১৪.৬৫ শতাংশ হাৰেৰে মাত্ৰ ৪৬,৪৩১ টা ভোট লাভ কৰিবলৈ সক্ষম হয়।
অৰুণাচল প্ৰদেশত লোকসভা নিৰ্বাচনৰ সমান্তৰালভাৱে ৰাজ্যখনৰ ৬০ খন বিধানসভা আসনৰ বাবে নিৰ্বাচন অনুষ্ঠিত হৈছিল। বৰ্তমানলৈ(১১.৪৫ অহ্ন) ভাৰতীয় নিৰ্বাচন আয়োগৰ তথ্যত প্ৰকাশ পোৱা অনুসৰি বিজেপিয়ে ৰাজ্যখনত একক সংখ্যাগৰিষ্ঠতা লাভ কৰি চৰকাৰ গঠনৰ দিশে অগ্ৰসৰ হৈছে।
বৰ্তমানলৈ ঘোষণা কৰা ৫৪ খন আসনৰ ফলাফলত বিজেপিয়ে ৩৩ খন আসনত জয়লাভ কৰাৰ উপৰি ২ খন আসনত অগ্ৰগতি লাভ কৰি আছে আৰু কংগ্ৰেছে ৪ খন আসনত জয়লাভ কৰিছে।
তদুপৰি, ৰাজ্যখনত নতুনকৈ আত্মপ্ৰকাশ কৰা জনতা দল (য়ুনাইটেডে) এইবাৰ ৭ খন আসন দখল কৰিবলৈ সক্ষময় হৈছে। অন্যান্য দলসমূহে ৬ খন আসন দখল কৰাৰ উপৰিও ২ খন আসনত অগ্ৰগতি লাভ কৰি আছে।
অৰুণাচলত বিজেপিৰ চমৎকাৰ প্ৰদৰ্শনত দলটোৰ কৰ্মকৰ্তা সকলৰ মাজত আনন্দৰ ঢল বৈছে।
