ষষ্ঠদশ লোকসভা ভংগৰ লগে লগে ৰাজ্যসভাত গৃহীত নোহোৱাৰ বাবে নাগৰিকত্ব সংশোধনী বিধেয়কখনৰ নিয়ম অনুসৰি সীমা উকলি (lapse) গ’ল। এতিয়া বিধেয়কখন গৃহীত কৰিবলৈ লোকসভাত পুনৰ নতুনকৈ উত্থাপন কৰিব লাগিব।
নাগৰিকত্ব সংশোধনী বিধেয়কখনৰ লগতে তিন তালাক নিষিদ্ধ কৰা বিধেয়কখন বিগত চৰকাৰখনৰ যোৱা লোকসভা অধিৱেশনৰ বাজেট অধিৱেশনৰ সময়ছোৱাত ৰাজ্যসভাত গৃহীত কৰাবলৈ সক্ষম হোৱা নাছিল।
বৰ্তমান লোকসভাখনৰ কাৰ্যকাল অহা ৩ জুনত অন্ত পৰিব যদিও নিৰ্বাচনী প্ৰক্ৰিয়া সমাপ্ত হৈ যোৱাৰ পাছত ৰাষ্ট্ৰপতি ৰামনাথ কোৱিন্দে যোৱা শনিবাৰে নিম্ন সদনখন ভংগ কৰি দিয়ে। আনহাতে, সপ্তদশ লোকসভাৰ প্ৰথম অধিৱেশন অহা ৬ জুনত অনুষ্ঠিত হোৱাৰ কথা আছে।
নিয়ম অনুসৰি ৰাজ্যসভাত উত্থাপন হৈ পৰি থকা বিধেয়ক লোকসভা ভংগ হ’লেও নিষ্ক্ৰিয় হৈ নাযায়। কিন্তু লোকসভাই গৃহীত কৰা আৰু ৰাজ্যসভাত পৰি থকা বিধেয়ক নিষ্ক্ৰিয় হৈ পৰে।
ৰাজ্যসভাত চৰকাৰৰ পৰ্যাপ্ত সদস্য নোহোৱাৰ পৰিপ্ৰেক্ষিতত বিৰোধীয়ে বিধেয়ক দুখনৰ বিৰোধিতা কৰাৰ বাবে ৰাজ্যসভাত উত্থাপন কৰা নহ’ল।
উল্লেখযোগ্য যে নাগৰিকত্ব সংশোধনী বিধেয়কখনৰ জৰিয়তে বাংলাদেশ, পাকিস্তান আৰু আফগানিস্তানৰ পৰা আহি পূৰ্বৰ ১২ বছৰৰ পৰিৱৰ্তে ৭ বছৰ ধৰি ভাৰতত বাস কৰি থকা হিন্দু, জৈন, খ্ৰীষ্টান, শিখ, বৌদ্ধ আৰু পাৰ্ছীসকলক কোনো নথি পত্ৰ অবিহনে ভাৰতীয় নাগৰিকত্ব দিব বিচৰা হৈছে।
যোৱা ৮ জানুৱাৰিত শীতকালীন অধিৱেশনত বিধেয়কখন লোকসভাত গৃহীত কৰা হৈছিল যদিও পাছত ৰাজ্যসভাত গৃহীত কৰাত ব্যৰ্থ হয়।
বিধেয়কখনৰ বিৰুদ্ধে অসম তথা উত্তৰ-পূৰ্বাঞ্চলৰ ৰাজ্যসমূহত তীব্ৰ প্ৰতিবাদী আন্দোলন গঢ়ি উঠিছিল। ছাত্ৰ সংগঠন, বিভিন্ন ৰাজনৈতিক দল তথা সামাজিক-সাংস্কৃতিক সংগঠনে প্ৰতিবাদ সাৱ্যস্ত কৰিছিল আৰু অসম চুক্তিৰ ১৯৭১ চনৰ সীমা উলংঘা কৰি ২০১৪ চনৰ ৩১ ডিচেম্বৰলৈকে ভাৰতলৈ অহা অ-মুছলমান সকলক নাগৰিকত্ব দিব বিচৰা কাৰ্যৰ বিৰোধিতা কৰিছিল।
বিধেয়ক বিৰোধী আন্দোলনৰ মাজতে অনুষ্ঠিত হোৱা লোকসভা নিৰ্বাচনত এইবাৰ বিজেপি দলে অকলেই একক সংখ্যাগৰিষ্ঠতা লাভ কৰিছে। আনহাতে, অতি সোনকালেই ৰাজ্যসভাতো বিজেপি আৰু ইয়াৰ সহযোগী দলে সংখ্যা গৰিষ্ঠতা লাভ কৰিব। তেনেক্ষেত্ৰত নাগৰিকত্ব সংশোধনী বিধেয়কখন গৃহীত কৰাৰ পথ সুচল হৈ পৰিব আৰু ইয়াৰ বিৰুদ্ধে হোৱা ৰাজপথৰ আন্দোলনৰো পৰিসমাপ্তি ঘটাৰ সম্ভাৱনা আছে।
