অসমত খালী হোৱা ৰাজ্যসভাৰ দুখন আসনৰ নিৰ্বাচনৰ বাবে আজি মনোনয়ন পত্ৰ দাখিলৰ অন্তিম দিন আছিল যদিও বিৰোধীক উৎসাহিত হোৱা দেখা নগ’ল। ফলত প্ৰাৰ্থী দিয়াৰ পৰা বিৰত থকা কংগ্ৰেছ আৰু এ আই য়ু ডি এফে শাসনাধিষ্ঠিত মিত্ৰ দলক বিনা যুদ্ধে দুয়োখন আসন এৰি দিয়াৰ দৰে হৈ পৰে।
আনহাতে বিৰোধী কংগ্ৰেছে প্ৰাৰ্থী আগ নবঢ়োৱাত অন্ত পৰাটো নিশ্চিত হ’ল প্ৰাক্তন প্ৰধান মন্ত্ৰী ড০ মনমোহন সিঙৰ অসমক প্ৰতিনিধিত্বৰ দীঘলীয়া যুগৰ। ড০ সিঙে ১৯৯১ চনৰ পৰা মুঠ ৫বাৰ ৰাজ্যখনক প্ৰতিনিধিত্ব কৰি ৰাজ্যসভালৈ নিৰ্বাচিত হৈছিল।
তাৰ দুটা কাৰ্য্যকালৰ সময়ছোৱাত তেওঁ আছিল দেশৰ প্ৰধান মন্ত্ৰী।
অহা ১৪ জুনত ড০ মনমোহন সিঙৰ লগতে আন এজন কংগ্ৰেছৰ সাংসদ শান্তিয়াছ কুজুৰৰো কাৰ্য্যকাল অন্ত পৰিব।
দুয়োখন আসনৰ বাবে অহা ৭ জুনত নিৰ্বাচন অনুষ্ঠিত হ’ব, যাৰ বাবে শাসনাধিষ্ঠিত বিজেপি আৰু অগপ, দুয়োটা দলে বুজাবুজিৰে একোজনকৈ প্ৰাৰ্থী থিয় কৰাইছে। আজি বিজেপিৰ হৈ যোৰহাট লোকসভা সমষ্টিৰ প্ৰাক্তন সাংসদ কামাখ্যা প্ৰসাদ তাছা আৰু অগপৰ প্ৰাক্তন সাংসদ বীৰেন্দ্ৰ প্ৰসাদ বৈশ্যই মনোনয়ন পত্ৰ দাখিল কৰে।
বিৰোধীয়ে কোনো প্ৰাৰ্থী নিদিয়াৰ প্ৰসংগত কংগ্ৰেছৰ মুখপাত্ৰ অপূৰ্ব ভট্টাচাৰ্য্যৰ সৈতে যোগাযোগ কৰাত প্ৰয়োজনীয় সংখ্যক বিধায়ক নথকাকে কাৰণ বুলি কয়।
“কংগ্ৰেছৰ লগত মেজিক নম্বৰ নাই বাবে প্ৰাৰ্থী দিয়া নাই। ৰাজ্যসভাৰ এখন আসনত জয়ী কৰাবলৈ ৪৩গৰাকী বিধায়ক লাগিব, কিন্তু আমাৰ লগত ইমান বিধায়ক নাই। যদি প্ৰাৰ্থিত্ব থিয় কৰালো হেঁতেন তেন্তে হৰ্ছ ট্ৰেডিঙৰ সুবিধা দিয়া হ’ল হেঁতেন। সেয়েহে আমি ৰাজ্যসভাৰ নিৰ্বাচনৰ পৰা আঁতৰত আছো।” নৰ্থ-ইষ্ট নাওক জনালে দলটোৰ মুখপাত্ৰজনে।
অসম বিধানসভাত কংগ্ৰেছৰ বৰ্তমান ২৫জন বিধায়ক আছে। এ আই য়ু ডি এফৰ আছে ১৩জন। অৱশ্যে দুয়োটা দলৰ বিধায়কৰ মুঠ সংখ্যাও এজনক জয়ী কৰাবৰ বাবে প্ৰয়োজনীয় ভোটৰ (৪২) বাবে কম হয়।
উল্লেখ কৰিব পাৰি, বৰ্তমানৰ বিজেপি মন্ত্ৰী ড০ হিমন্ত বিশ্ব শৰ্মা কংগ্ৰেছত থকা সময়ত প্ৰয়োজনীয় সংখ্যক বিধায়ক নথকা সত্ত্বেও কংগ্ৰেছে ২০০৯ চনৰ দুখন আসনত আৰু ২০১৪ চনত তিনিখন আসনত প্ৰাৰ্থী দি সেই সময়ত বিৰোধী (এ আই য়ু ডি এফ) আৰু নিৰ্দলীয় বিধায়কৰ ভোটেৰে আটাইকেইজনক জয়ী কৰাবলৈ সক্ষম হৈছিল। চাৰিওপিনে হৰ্ছ ট্ৰেডিং কৰাৰ মুকলি অভিযোগে গণতান্ত্ৰিক ব্যৱস্থাটোক লৈ উদ্বেগৰ সৃষ্টি কৰিছিল।
এসময়ত প্ৰয়োজনীয় সংখ্যক বিধায়ক নথকা সত্ত্বেও নিজৰ প্ৰাৰ্থীক জিকাই আনিবলৈ সক্ষম হোৱা হিমন্তবিহীন কংগ্ৰেছে প্ৰাৰ্থী দিবলৈকে সাহস নকৰাটো লক্ষণীয়।
