ছিকিমৰ মুখ্য মন্ত্ৰী ৰূপে শপত লৈয়ে প্ৰেম সিং তামাঙে ৰাজ্যখনৰ চৰকাৰী কৰ্মচাৰীলৈ আগবঢ়োৱা দুদিনকৈ সাপ্তাহিক বন্ধৰ ঘোষণাই অসম চৰকাৰৰ চাকৰিয়ালৰ মাজতো চৰ্চা লাভ কৰিছে।
এই চৰ্চাৰ মাজতে পোহৰলৈ আহিছে বিষয়টো সন্দৰ্ভত সদৌ অসম কৰ্মচাৰী পৰিষদৰ স্থিতি আৰু সংগঠনটোৱে অসম চৰকাৰক জনোৱা মত।
পৰিষদৰ সভাপতি বাসৱ চন্দ্ৰ কলিতাই নৰ্থ ইষ্ট নাও-ক জনোৱা মতে ২০১৮ চনত মুখ্য সচিব পৰ্য্যায়ত অনুষ্ঠিত বৈঠকত সপ্তাহত পাঁচদিনীয়া কৰ্মদিনৰ প্ৰস্তাৱ পৰিষদে ইতিমধ্যে ৰাখিছে।
বিষয়টো সন্দৰ্ভত অসম চৰকাৰৰ ফালৰ পৰা এতিয়ালৈকে কোনো সঁহাৰি অহা নাই।
কলিতাই লগতে কয় যে সোণোৱাল চৰকাৰে চৰকাৰী কাৰ্য্যালয়ৰ কৰ্মসময় বৃদ্ধি কৰাটো কৰ্মচাৰীসকলে “অন্তৰত দুখ লৈয়ো” মানি লৈছে যদিও এইক্ষেত্ৰত তেওঁলোকৰ কেইটামান দাবী আছে।
কাৰ্য্যালয়ৰ কৰ্ম সময় পুৱা ৯:৪৫ৰ পৰা সন্ধিয়া ৫বজাৰ ভিতৰত কৰ্মচাৰীসকলক এটা বিৰতি দিয়া। আৰু যাতায়াতৰ ক্ষেত্ৰত কৰ্মচাৰীসকলৰ সুবিধালৈ চকু দিয়াকে ধৰি সমগ্ৰ ব্যৱস্থাটোকে উন্নত কৰা।
তেওঁ কয় যে অক্তোবৰৰ পৰা ফেব্ৰুৱাৰিলৈকে যিহেতু সোনকালে আন্ধাৰ হয়, সেয়ে কাৰ্য্যালয়ৰ পৰা আহ-যাহৰ ক্ষেত্ৰত বহু কৰ্মচাৰী অসুবিধাত পৰে। পূৰ্বে এই সময়চোৱাত কৰ্মসময় আছিল পুৱা ১০বজাৰ পৰা আবেলি ৪:১৫লৈকে যিটো বৰ্তমান পৰিৱৰ্তন কৰা হ’ল।
২০১৬ চনৰ ২৬ অক্তোবৰত অসমৰ কাৰ্য্যালয়ৰ কৰ্মসময় সলনিৰ জাননী জাৰি কৰা হৈছিল।
