নৱগঠিত অৰুণাচল প্ৰদেশ চৰকাৰৰ বিধানসভাৰ অধ্যক্ষ হিচাপে নিৰ্বাচিত হৈছে মেচুকা সমষ্টিৰ বিজেপি বিধায়ক পাচাং দৰ্জি চোনা। সপ্তম সংখ্যক বিধানসভাৰ অধ্যক্ষ হিচাপে চোনাৰ নামটো ঘোষণা কৰে ফ’চুম খিমহুমে।
উল্লেখ্য যে যোৱা সোমবাৰে ৰাজ্যৰ মুখ্য মন্ত্ৰী পেমা খাণ্ডু, উপ মুখ্য মন্ত্ৰী চাওনা মিন আৰু গৃহ মন্ত্ৰী বামাং ফেলিক্সৰ উপস্থিতিত বিধানসভাৰ অধ্যক্ষ পদটোৰ বাবে দৰ্জি চোনাই মনোনয়ন দাখিল কৰিছিল।
দিল্লী বিশ্ববিদ্যালয়ৰ পৰা স্নাতক লোৱা ৪৭ বছৰীয়া চোনা প্ৰাক্তন বিধানসভাৰ অধ্যক্ষ পাচাং ৱাংচুক চোনাৰ পুত্ৰ।
চোনাই কংগ্ৰেছ দলৰ পৰা প্ৰতিদ্বন্দ্বিতা আগবঢ়াই মেচুকা সমষ্টিৰ পৰা পোন প্ৰথমবাৰৰ বাবে বিধানসভালৈ নিৰ্বাচিত হৈছিল। তদুপৰি ২০১৪ চনৰ নিৰ্বাচনত পিপলছ পাৰ্টি অব অৰুণাচলৰ টিকটত নিৰ্বাচিত হৈছিল। পাছত ২০১৬ চনত চোনাৰ লগতে মুখ্য মন্ত্ৰী পেমা খাণ্ডু আৰু আন বহুতে একেলগে বিজেপিত যোগদান কৰে।
সদ্য সমাপ্ত বিধানসভা নিৰ্বাচনত বিজেপিৰ পৰা প্ৰতিদ্বন্দ্বিতা আগবঢ়োৱা চোনাই এন পি পিৰ টৰি ৰেগৰক মাত্ৰ ৬৮টা ভোটৰ ব্যৱধানত পৰাস্ত কৰিবলৈ সক্ষম হৈছিল।
ইফালে উপাধ্যক্ষ পদত নিৰ্বাচিত হৈছে চাংলাং(উত্তৰ) সমষ্টিৰ বিজেপি বিধায়ক তেছাম পংতে।
