নগাঁও জিলাৰ চামগুৰিৰ ৰঙাগড়াত বুধবাৰে নিশা সংঘটিত এক পথ দুৰ্ঘটনাক কেন্দ্ৰ কৰি সম্প্ৰতি সমগ্ৰ অঞ্চলজুৰি এক শোকাকুল পৰিবেশৰ সৃষ্টি হৈছে। পত্নীৰ বাবে উপহাৰ কিনি ওভতাৰ পথত ভয়ংকৰ দুৰ্ঘটনাত পতিত হৈ প্ৰাণ হেৰুৱাব লগীয়া হ’ল এজন যুৱকে।
নিহত যুৱকজনক চামগুৰিৰ আমলখি বাগিচাৰ প্ৰাঞ্জল প্ৰধান বুলি চিনাক্ত কৰা হৈছে। আনহাতে দুৰ্ঘটনাটোত প্ৰাঞ্জলৰ সৈতে বাইকত উঠি অহা বিনয় বেহেৰা নামৰ যুৱকজন গুৰুতৰভাবে আহত হয়।
প্ৰাপ্ত তথ্য মতে প্ৰথম বিবাহ বাৰ্ষিকী উপলক্ষ্যে পত্নীৰ বাবে আমনিৰ পৰা উপহাৰ লৈ বন্ধু বিনয়ৰ সৈতে এ এছ -১২ ডব্লিউ -৪৩৯৭ নম্বৰ আপাচি বাইকেৰে আমলখি বাগিচাস্থিত নিজ ঘৰলৈ আহি থকাৰ সময়তে দুৰ্ঘটনাটো সংঘটিত হয়।
স্থানীয় ৰাইজে জনোৱা অনুসৰি ৰঙাগড়া তিনিআলিৰ সমীপত যান্ত্ৰিক বিজুতিৰ বাবে ৩৭নং ৰাষ্ট্ৰীয় ঘাই পথৰ ওপৰত ৰখাই থোৱা এ এছ -০৭ চি -০৭২৫ নম্বৰৰ এখন ট্ৰাকত পিছফালৰ পৰা প্ৰাঞ্জলৰ বাইকে খুন্দা মাৰে।
দুৰ্ঘটনাটোত বাইক চলাই অহা প্ৰাঞ্জল থিতাতে নিহত হোৱাৰ লগতে উঠি অহা বিনয় বেহেৰা গুৰুতৰভাবে আহত হোৱাত তেওঁক সংকটজনক অৱস্থাত স্থানীয় ৰাইজৰ সহযোগত ঘটনাস্থলত উপস্থিত হোৱা চামগুৰি আৰক্ষীয়ে গুৱাহাটীলৈ প্ৰেৰণ কৰে।
তদুপৰি ঘটনাস্থলৰ পৰা দুৰ্ঘটনাগ্ৰস্ত ট্ৰাক আৰু বাইকখনৰ লগতে প্ৰাঞ্জল প্ৰধানৰ মৃতহেদ উদ্ধাৰ কৰি মৰণোত্তৰ পৰীক্ষাৰ বাবে নগাঁৱলৈ প্ৰেৰণ কৰা হয় বুলি আৰক্ষীয়ে জনায়।
