‘বি পি এফৰ কু শাসনৰ পৰা অহা বছৰ মুক্ত হ’ব বি টি চিৰ ৰাইজ। কিয়নো ২০২০ত অনুষ্ঠিত হ’ব লগীয়া বি টি চিৰ পৰিষদীয় নিৰ্বাচনত ৪০খন আসনৰ ২৭খনেই অবড়ো সুৰক্ষা সমিতিয়ে দখল কৰিব’। কোকৰাঝাৰ সমষ্টিৰ পৰা দ্বিতীয়বাৰৰ বাবে লোকসভালৈ নিৰ্বাচিত হোৱা নৱ কুমাৰ শৰণীয়াই বুধবাৰে এই মন্তব্য কৰে।
উল্লেখ্য যে বুধবাৰে বাক্সা জিলাৰ ধমধমাত আঞ্চলিক শৰণীয়া কছাৰী ছাত্ৰ সন্থাই আয়োজন কৰা এখন সম্বৰ্ধনা সভাত সাংসদ শৰণীয়াই হাগ্ৰামা নেতৃত্বাধীন বি পি এফক উদ্দেশ্যি আৰু কয়, ‘বছৰত বি টি চিলৈ ৫ হাজাৰ কোটি টকা আহে। এই টকাৰে তেওঁলোকে বি টি চিৰ চেহেৰা সলনি কৰি দিব লাগিছিল। কিন্তু প্ৰকৃততে সেয়া হৈ উঠা নাই’।
আনহাতে অবড়ো বসতিপ্ৰধান অঞ্চল সমূহত হাগ্ৰামা মহিলাৰীয়ে উন্নয়নৰ বাবে একো কৰা নাই বুলিও অভিযোগ আনে সাংসদ শৰণীয়াই। ইয়াৰ উপৰি সাংসদ গৰাকীয়ে অতি আক্ষেপেৰে কয় যে বি পি এফ দলে ৰাজ্য চৰকাৰৰ অংশীদাৰ হিচাপে চৰকাৰত তিনিজনকৈ কেবিনেট মন্ত্ৰী লাভ কৰাৰ পাছতো বি টি চি ৰাইজৰ আৰ্থ-সামাজিক উন্নয়ন নহ’ল।
উল্লেখ্য যে বুধবাৰে ধমধমাৰ শৰণীয়া কৃষ্টি সংঘত দ্বিতীয়বাৰৰ বাবে সাংসদ হোৱা শৰণীয়াক সম্বৰ্ধনা জনোৱা হয়। ধমধমা আঞ্চলিক শৰণীয়া কছাৰী ছাত্ৰ সন্থাৰ উদ্যোগত আয়োজন কৰা অনুষ্ঠানত অঞ্চলটোৰ বিভিন্ন অনুষ্ঠান-প্ৰতিষ্ঠানে সাংসদ গৰাকীক সম্বৰ্ধনা জনায়।
