অধ্যাপক বিৰিঞ্চি কুমাৰ বৰুৱা স্মৃতি বক্তৃতা ২০১৯ অহা ৯ জুন দেওবাৰে গুৱাহাটীৰ উজানবজাৰস্থিত বিবেকানন্দ কেন্দ্ৰত অনুষ্ঠিত হ’ব।
আবেলি ৪ বজাৰ পৰা আৰম্ভ হ’ব লগা বক্তৃতাটোৰ বিষয়বস্তু “English Literature Studies in India: Past, Present and Future”।
বক্তৃতাটো প্ৰদান কৰিব সাহিত্য অকাদেমিৰ সাধাৰণ পৰিষদৰ ইংৰাজী ভাষা ব’ৰ্দৰ সমন্বয়ক সংযুক্তা দাসগুপ্তাই। দাসগুপ্তা কলিকতা বিশ্ববিদ্যালয়ৰ ইংৰাজী বিভাগৰ প্ৰাক্তন মুৰব্বী তথা কলা শাখাৰ প্ৰাক্তন কলাগুৰু।
একেটা অনুষ্ঠানতে অধ্যাপক বৰুৱাৰ “আঘোণী বাই” শীৰ্ষক চুটিগল্প সংকলনৰ ইংৰাজী অনুবাদ “Aghoni Bai And Other Stories”ও উন্মোচন কৰা হ’ব।
মিত্ৰা ফুকনে অসমীয়াৰ পৰা অনুবাদ কৰা গ্ৰন্থখন উন্মোচন কৰিব অৱসৰপ্ৰাপ্ত ন্যায়াধীশ ধীৰেশ নাৰায়ণ চৌধুৰীয়ে।
বিৰিঞ্চি কুমাৰ বৰুৱা স্মৃতি ন্যাসে আয়োজন কৰা অনুষ্ঠানটোত সভাপতিত্ব কৰিব ন্যাসৰ সভাপতি নগেন শইকীয়াই।
লোকসংস্কৃতিৰ গৱেষক, অধ্যাপক বৰুৱাৰ দুই উপন্যাস “জীৱনৰ বাটত” আৰু “সেউজী পাতৰ কাহিনী” অসমীয়া সাহিত্যৰ উৎকৃষ্টতম সাহিত্য কৃতি বুলি স্বীকৃত। ক্ৰমে বীণা বৰুৱা আৰু ৰাস্না বৰুৱা ছদ্মনামত তেওঁ উপন্যাস দুখন লিখিছিল।
