গুৱাহাটী বিশ্ববিদ্যালয়ত অধ্যয়নৰত আৰু বিশ্ববিদ্যালয়খনৰ ছাত্ৰী নিৱাসত থকা এগৰাকী ছাত্ৰীক যৌন নিৰ্য্যাতন কৰা ঘটনা এটা পোহৰলৈ আহিছে।
ভুক্তভোগী ছাত্ৰীগৰাকী নাগালেণ্ডৰ আৰু তেওঁ উচ্চ শিক্ষাৰ প্ৰতিষ্ঠানটোত আইন শাস্ত্ৰ পঢ়ি আছে। বিশ্ববিদ্যালয়খনৰ ৰাণী গাইডালু ছাত্ৰী নিৱাসৰ এগৰাকী আৱাসী।
ছাত্ৰীগৰাকীয়ে যোৱা ৫ জুনত সন্ধিয়া ৮:২০ বজাত লগৰ কেইগৰাকীৰ সৈতে সান্ধ্য ভ্ৰমণ কৰি ঘূৰি আহোতেই দুৰ্ভাগ্যজনক ঘটনাটো ঘটে।
ভুক্তভোগী ছাত্ৰীগৰাকীয়ে ইতিমধ্যে এখন এজাহাৰ জালুকবাৰী আৰক্ষী চকীত দাখিল কৰিছে আৰু তাৰ ভিত্তিত গোচৰ ৰুজু কৰি আৰক্ষীয়ে তদন্ত অব্যাহত ৰাখিছে বুলি জনালে জালুকবাৰী আৰক্ষী চকীৰ ভাৰপ্ৰাপ্ত বিষয়া বিশ্বজিৎ ডেকাই। ডেকাই অৱশ্যে গোচৰ নম্বৰ জনাবলৈ অস্বীকাৰ কৰে।
এজাহাৰখনত ছাত্ৰীগৰাকীয়ে উল্লেখ কৰিছে যে তেওঁ সতীৰ্থ ছাত্ৰীসকলৰ সৈতে সান্ধ্য ভ্ৰমণৰ পৰা ঘূৰি আহোতে এজন যুৱকে পিছফালৰ পৰা সাৱটি ধৰে আৰু তেওঁৰ “প্ৰাইভেট পাৰ্ট”ত হাত দিয়ে। অপৰাধী সম্পৰ্কত তেওঁ “অচিনাক্ত দুৰ্বৃত্ত” বুলি উল্লেখ কৰিছে।
ঘটনাটোৰ সময়ত ভুক্তভোগী ছাত্ৰীগৰাকীৰ লগত থকা এগৰাকী ছাত্ৰীৰ ভাষ্য, ঘটনাটো ঘটিছিল তেওঁলোক থকা হোষ্টেলটোৰ পৰা আধা কিলোমিটাৰৰ পৰা এক কিলোমিটাৰৰ ভিতৰত, যেতিয়া তেওঁলোকে সান্ধ্য ভ্ৰমণৰ পৰা ঘূৰি আহিছিল (বৰষুণৰ বাবে সোনকালে ঘূৰিছিল আটাইকেইগৰাকী)। সেই সময়তে কম পোহৰৰ সুযোগ লৈ (ষ্ট্ৰীট লাইট নাছিল) অচিনাক্ত যুৱকজনে (২২-২৫ বছৰ বয়সৰ, ছাত্ৰীগৰাকীৰ অনুমান) পিছফালৰ পৰা সতীৰ্থ ছাত্ৰীগৰাকীক সাৱটিবলৈ চেষ্টা কৰে।
“পিছে পিছে আহি থকা ল’ৰাটোৱে আমাক ধৰিব চালে। সি মোৰ লগৰজনীক পিছফালৰ পৰা সাৱটি ধৰিলে। আমি চিঞৰিলো আৰু তাই এৰুৱাই আহিল। আমি দৌৰিলো, আকৌ দৌৰিলো। দৌৰি আহোঁতে সি আকৌ পিছে পিছে আহিছে। পিছে পিছে আহি আকৌ ধৰি পেলাই দিছিল। আমি আকৌ দৌৰিলো… সেইখিনি আন্ধাৰ আছিল…।” এটা ব্যক্তিগত খণ্ডৰ সংবাদ প্ৰতিষ্ঠানৰ সাংবাদিকৰ আগত ভয়ংকৰ মুহূৰ্তটোৰ বিৱৰণ সতীৰ্থ ছাত্ৰীগৰাকীৰ।
ছাত্ৰীকেইগৰাকীয়ে জনোৱা মতে, ঘটনাটোৰ স্থান বিশ্ববিদ্যালয়ৰ মুখ্য দ্বাৰৰ সমীপৰ য়ু বি আই এ টি এম চেণ্টাৰৰ সমীপ।
সতীৰ্থ ছাত্ৰীগৰাকীয়ে সংবাদ মাধ্যমৰ আগত দিয়া স্বীকাৰোক্তিৰ পৰা এইটো স্পষ্ট হৈছে যে বিশ্ববিদ্যালয়খনৰ ছাত্ৰী নিৱাসবোৰ আৰু ছাত্ৰী নিৱাসবোৰৰ আশ-পাশৰ অঞ্চল ছাত্ৰীসকলৰ বাবে নিৰাপদ হৈ থকা নাই।
ছাত্ৰীগৰাকীয়ে এনেকুৱা ঘটনা প্ৰায়ে ঘটি থকা বুলি আৰু লাজ আৰু অন্যান্য কাৰণত বহুতে মুখ নোখোলে বুলি গুৰুতৰ অভিযোগ কৰে।
বিশ্ববিদ্যালয়ৰ ছাত্ৰ-ছাত্ৰীৰ প্ৰতিবাদ
হোষ্টেলৰ এগৰাকী ছাত্ৰীক অচিনাক্ত দুৰ্বৃত্তই আন্ধাৰৰ সুযোগ লৈ যৌন নিৰ্য্যাতন কৰা ঘটনাৰ পিছত আজি গুৱাহাটী বিশ্ববিদ্যালয়ৰ ছাত্ৰ-ছাত্ৰীসকলে এটা প্ৰতিবাদী কাৰ্য্যসূচী উলিয়ায়। গুৱাহাটী বিশ্ববিদ্যালয়ৰ সন্মুখত থিয় হৈ ছাত্ৰ-ছাত্ৰীসকলে ছাত্ৰীসকলৰ নিৰাপত্তা নিশ্চিত কৰাৰ বাবে কৰ্তৃপক্ষক দাবী জনায়।
