গুৱাহাটী বিশ্ববিদ্যালয়ত অধ্যয়নৰত আৰু বিশ্ববিদ্যালয়খনৰ ছাত্ৰী নিৱাসত থকা এগৰাকী ছাত্ৰীক যৌন নিৰ্য্যাতন কৰা ঘটনাৰ চাঞ্চল্য মাৰ নৌযাওঁতেই পুনৰ বিশ্ববিদ্যালয়খনৰ আন এগৰাকী ছাত্ৰী যৌন নিৰ্যাতনৰ বলি হয়।
এইবাৰ বিশ্ববিদ্যালয়খনৰ চৌহদৰ সমীপৰ লংকেশ্বৰত ছাত্ৰীক যৌন নিৰ্যাতনৰ ঘটনা সংঘটিত হয়। ঘটনাৰ বিৱৰণি মতে কালি অৰ্থাৎ ৮ জুনৰ সন্ধিয়া কৈলাশপুৰত পেইং গেইষ্টত থকা দুগৰাকী ছাত্ৰীয়ে লংকেশ্বৰত বজাৰ কৰিবলৈ গৈছিল।
আৰু ছাত্ৰী দুগৰাকীয়ে বজাৰৰ পৰা প্ৰায় ৮ মান বজাত উভটি অহা সময়ত মটৰচাইকেলত হেলমেট পৰিধান কৰি অহা দুজন যুৱকে ছাত্ৰী দুগৰাকীৰ মাজৰে এগৰাকীৰ শৰীৰৰ বুকুত স্পৰ্শ কৰি পলায়ন কৰে।
ছাত্ৰী দুগৰাকীয়ে চিঞৰ-বাখৰ কৰাত স্থানীয় ৰাইজে মটৰচাইকেলত অহা দুৰ্বৃত্ত কেইটাক কৰায়ত্ত কৰা চেষ্টা চলাই যদিও দুৰ্বৃত্তকেইটা পলায়ন কৰিবলৈ সক্ষম হয়। অৱশ্যে এগৰাকী ছাত্ৰীয়ে মটৰচাইকেলখনৰ ০৭৭৩ নম্বৰটো মনত ৰাখিবলৈ সক্ষম হয়।
ঘটনা সংঘটিত হোৱাৰ পিছতে ভুক্তভোগী ছাত্ৰীগৰাকীৰ বান্ধৱীয়ে ছ’চিয়েল মিডিয়াত বিষয়টো উত্থাপন কৰে। আনহাতে ঘটনা সন্দৰ্ভত ভুক্তভোগী ছাত্ৰী গৰাকীয়ে আৰক্ষী থানাত গোচৰ ৰুজু কৰিছে নে নাই তাক বাতৰি লিখা পৰলৈকে জানিব পৰা হোৱা নাই।
