মুখ্য মন্ত্ৰী সৰ্বানন্দ সোণোৱালে শনিবাৰে নতুন দিল্লীত প্ৰধান মন্ত্ৰী তথা নিটি আয়োগৰ অধ্যক্ষ নৰেন্দ্ৰ মোদীৰ অধ্যক্ষতাত অনুষ্ঠিত আয়োগৰ পঞ্চম কাৰ্যকৰী পৰিষদৰ বৈঠকত অংশগ্ৰহণ কৰি অসমৰ গৰাখহনীয়া সমস্যাক প্ৰাকৃতিক দুৰ্যোগৰ তালিকাত অন্তৰ্ভূক্ত কৰাৰ বাবে আহ্বান জনায়।
অসম যিহেতু এখন বানপীড়িত ৰাজ্য সেয়েহে বান প্ৰতিৰোধ, পুনৰ নিৰ্মাণ, বান সাহাৰ্য আৰু পুনৰ সংস্থাপনৰ বাবে অধিক অধিক ধনৰাশি আবণ্টনৰ বাবেও অনুৰোধ জনাই সোণোৱালে।
তেওঁ কয় যে নদীৰ গৰাখহনীয়াই বছৰি প্ৰায় ৮ হাজাৰ হেক্টৰ ভূমি বিলুপ্ত কৰে। অসমত ১৯৫০ চনৰ পৰা এতিয়ালৈ ১.২৫ লাখ কৃষিজীৱি পৰিয়ালৰ প্ৰায় ৪.২৭ লাখ হেক্টৰ ভূমি বিলুপ্ত হৈছে ।
সেয়েহে উক্ত সমস্যাক এন ডি আৰ এফ তথা এছ ডি আৰ এফৰ নিয়মাৱলীৰ প্ৰাকৃতিক দুৰ্যোগৰ শিতানত অন্তৰ্ভুক্ত কৰাটো একান্ত প্ৰয়োজন বুলি তেওঁ উল্লেখ কৰে।
কালিৰ এই বৈঠকতে মুখ্য মন্ত্ৰীয়ে লগতে অসমৰ ৭খন জিলাক এছপাইৰেশ্যনেল জিলাত অন্তৰ্ভুক্ত কৰা হৈছে বুলি সদৰী কৰে। ‘ৰাজ্য চৰকাৰে চলিত বৰ্ষৰ বাজেটত এই জিলা কেইখনৰ উন্নয়নৰ বাবে 28 কোটি টকা ধাৰ্য কৰিছে’ তেওঁ কয় । উল্লখযোগ্য যে উক্ত ৭খন জিলাৰ ভিতৰত হাইলাকান্দি জিলাই সমগ্ৰ দেশৰ ভিতৰতে প্ৰথম স্থান দখল কৰিবলৈ সক্ষম হৈছে।
আনহাতে চলিত বিত্তীয় বৰ্ষত ৰাজ্যখনৰ ১ লাখ কৃষক পৰিয়াললৈ মাটিৰ পট্টা বিতৰণৰ কাৰ্যসূচী গ্ৰহণ কৰিছে বুলিও তেওঁ কয়।
