আই লীগৰ প্ৰাক্তন চেম্পিয়ন আইজল এফ চি তথা কলকাতাৰ ইষ্ট বেংগল আৰু মোহন বাগানৰ প্ৰশিক্ষক খালিদ জামিল হ’ব নৰ্থ-ইষ্ট য়ুনাইটেড এফ চি একাডেমিৰ মুখ্য প্ৰশিক্ষক আৰু দলটোৰ সহকাৰী প্ৰশিক্ষক।
কুৱেইটত জন্মগ্ৰহণ কৰা খালিদক নৰ্থ-ইষ্ট য়ুনাইটেডে তিনি বছৰৰ বাবে চুক্তিবদ্ধ কৰিছে। তেওঁ ভাৰতীয় ফুটবল দলৰ হৈ সাতখন মেচত অংশ গ্ৰহণ কৰিছিল। ২০০১ চনত ভাৰতীয় দলত অভিষেক ঘটিছিল খালিদৰ।
১২ বছৰীয়া ফুটবল কেৰিয়াৰত খালিদে ভাৰতৰ আগশাৰীৰ তিনিটা ক্লাবৰ হৈ খেলিছিল। খেলবিধৰ পৰা ২০০৯ চনত অৱসৰ লয়। আৰু তাৰ পিছৰ পৰাই প্ৰশিক্ষক হিচাপে নিজকে প্ৰস্তুত কৰাত গুৰুত্ব প্ৰদান কৰে।
আই লীগত প্ৰতিদ্বন্দ্বিতা কৰা আইজল এফ চিৰ মুখ্য প্ৰশিক্ষক হিচাপে খালিদে ২০১৭ চনত দায়িত্ব গ্ৰহণ কৰে। দায়িত্ব গ্ৰহণ কৰিয়ে খালিদৰ নেতৃত্বত আইজল এফ চিয়ে আই লীগৰ খিতাপ দখল কৰে। আই লীগৰ খিতাপ দখল কৰা আইজল এফ চি হৈছে উত্তৰ-পূবৰ একমাত্ৰ ফুটবল ক্লাব।
প্ৰশিক্ষক হিচাপে প্ৰথমটো বছৰতে চমক সৃষ্টি কৰা খালিদক কলকাতাৰ প্ৰসিদ্ধ ক্লাব ইষ্ট বেংগলে অভিলেখ সংখ্যক ১.২৫ কোটি টকাত চুক্তিবদ্ধ কৰে।
ইয়াৰ পিছতে চলিত বছৰৰ জানুৱাৰিত তেওঁ ইষ্ট বেংগল এৰি কলকাতাৰে আন এটা ঐতিহাসিক ক্লাব মোহন বাগান এফ চিত মুখ্য প্ৰশিক্ষকৰ দায়িত্ব গ্ৰহণ কৰে। কিন্তু নৰ্থ-ইষ্ট য়ুনাইটেডৰ স্বত্তাধিকাৰী জন আব্ৰাহামৰ অনুৰোধত খালিদে ১৯ জুনত নৰ্থ-ইষ্ট য়ুনাইটেডত যোগ দিয়াৰ সিদ্ধান্ত লয়।
ক্লাবটোত চুক্তিবদ্ধ হোৱাত খালিদে কয়, ‘ক্লাবৰ মেনেজমেণ্টে মোৰ ওপৰত কৰা বিশ্বাস আৰু এই সুযোগ দিয়াৰ বাবে তেওঁলোকক ধন্যবাদ জনাইছো। ক্লাবটোৰ সহকাৰী প্ৰশিক্ষক হিচাপে মই মোৰ নিজৰ সৰ্বোচ্চ দিয়াৰ চেষ্টা কৰিম। প্ৰথমবাৰৰ বাবে মই আই এছ এলত কাম কৰাৰ সুযোগ পাইছো আৰু মই সম্পূৰ্ণ আত্মবিশ্বাসী যে দলটোৱে যোৱাবাৰৰ দৰে ভাল প্ৰদৰ্শন কৰিব।
