আই চি চি বিশ্বকাপ ২০১৯’ৰ আগন্তুক ইংলেণ্ডৰ বিৰুদ্ধে হ’বলগীয়া খেলখনত ভাৰতীয় দলটোৱে তেওঁলোকৰ বিকল্প জাৰ্চি পৰিধান কৰিব লাগিব। পিছপিনৰ পৰা গেৰুৱা দেখা জাৰ্চিটোৰ সন্মুখভাগ নীলা ৰঙৰেই দেখা যাব।
পূৰ্বৰ নীলা ৰঙৰ তুলনাত এই জাৰ্চিৰ পিছৰ অংশৰ ৰং হ’ব গেৰুৱা। অৱশ্যে, বাকী দলবোৰৰ সৈতে খেলাৰ সময়ত ভাৰতীয় দলে তেওঁলোকৰ পৰম্পৰাগত নীলা ৰঙৰ জাৰ্চি পিন্ধিয়েই খেলিব।
এই সন্দৰ্ভত বিশেষ খৱৰ ৰখা এক সূত্ৰই জানিব দিয়া মতে বেছিভাগ লোকে ভৱাৰ দৰে ই সেই জাৰ্চি নহয়। ই এক প্ৰকাৰ বিকল্প জাৰ্চিহে আৰু এয়া আই চি চিৰ খেলৰ নিয়মৰ আধাৰত প্ৰচলিত।
সূত্ৰটোৱে কয়, ‘’বিভিন্ন মহলে এই জাৰ্চিক লৈ বিভিন্ন মন্তব্য কৰিছে। ইয়াক এতিয়া জাৰ্চি বুলি কোৱা হৈছে যদিও ই সেয়া নহয়। ই এক বিকল্প জাৰ্চিহে যিটো ভাৰতীয় ক্ৰিকেট দলে অহা ৩০ জুনত ইংলেণ্ডৰ সৈতে হ’বলগীয়া খেলখনত পৰিধান কৰিব। আই চি চিৰ নিয়ম অনুসৰি আয়োজক দেশে আই চি চিৰ প্ৰতিযোগিতাৰ খেলত নিজৰ জাৰ্চিৰ ৰং অক্ষুন্ন ৰাখিব লাগে। সেয়েহে, ভাৰতীয় দলৰ জাৰ্চিৰ ৰঙো আয়োজক ইংলেণ্ডৰ দৰে নীলা হোৱাত ভাৰতৰ জাৰ্চিত পৰিৱৰ্তন অনা হ’ল।‘’
ভাৰতীয় দলৰ জাৰ্চিৰ ৰং নীলা হোৱাৰ লগতে ইংলেণ্ডৰ দলটোৰো জাৰ্চিৰ ৰং নীলা। ইংলেণ্ডৰ দলটোৰ নীলা ৰঙটো কিছু পাতল হোৱাৰ বিপৰীতে ভাৰতৰ নীলা ৰঙটো গাঢ়। সেয়ে, খেলৰ সময়ত যাতে কোনো ভ্ৰান্তিৰ সৃষ্টি নহয় তাৰ বাবে ভাৰতীয় দলটোৱে জাৰ্চিৰ ৰং সলনি কৰিব লাগিব।
উল্লেখযোগ্য যে চলিত বিশ্বকাপ-২০১৯’ত এইবাৰ ১০ টা দলে অংশ গ্ৰহণ কৰিছে। ইয়াৰ ভিতৰত কিছুমান দলৰ খেলুৱৈসকলৰ দুই ধৰণৰ জাৰ্চি আছে। ইতিমধ্যে, বাংলাদেশৰ বিৰুদ্ধে হোৱা খেলখনত দক্ষিণ আফ্ৰিকাই বিকল্প জাৰ্চি পৰিধান কৰিছিল। কিয়নো দক্ষিণ আফ্ৰিকাই তেওঁলোকৰ পৰম্পৰাগত জাৰ্চি পৰিধান কৰিলে বাংলাদেশৰ জাৰ্চিৰ সৈতে একে সেউজীয়া ৰঙৰ হৈ পৰে।
আনহাতে, ইয়াৰ পূৰ্বে ভাৰতীয় ক্ৰিকেট দলে কেতিয়াও দুইধৰণৰ জাৰ্চি পৰিধান কৰি খেলত অৱতীৰ্ণ হোৱা নাছিল। প্ৰথমবাৰৰ বাবে ভাৰতীয় ক্ৰিকেট দলটোৱে দুই ধৰণৰ জাৰ্চিৰে খেলত অৱতীৰ্ণ হ’বলৈ গৈ আছে। পৰম্পৰাগত নীলা ৰঙৰ পৰিৱৰ্তে বিকল্প জাৰ্চিৰ পাছৰ অংশটোৰ ৰং হৈছে গেৰুৱা।
