শুকুৰবাৰে আছিল পঞ্চম আন্তঃৰাষ্ট্ৰীয় যোগ দিৱস। যোগ দিৱস উপলক্ষে সমগ্ৰ দেশ আৰু বিশ্বৰ লগতে শিৱসাগৰতো বিভিন্ন কাৰ্যসূচীৰে যোগ দিৱস পালন কৰা হয়।
শিৱসাগৰ জিলা প্ৰশাসনৰ উদ্যোগত তথা ৰাষ্ট্ৰীয় আয়ূস অভিযান, জিলা স্বাস্থ্য সমিতি আৰু আই ৱাই এন এছৰ সহযোগত চাওলুং চ্যুকাফা ইণ্ডোৰ ষ্টেডিয়ামত আন্তঃৰাষ্ট্ৰীয় যোগ দিৱস পালন কৰে।
পুৱা ৮ বজাৰ পৰা অনুষ্ঠিত হোৱা যোগ দিৱসত অংশগ্ৰহণ কৰে জিলা উপায়ুক্ত ডাঃ এছ লক্ষ্মণন, জিলা আৰক্ষী অধীক্ষক অমিতাভ সিনহা, ৰ্অজুন ভোগেশ্বৰ বৰুৱা, অতিৰিক্ত আৰক্ষী অধীক্ষক বলীন দেউৰী, অ’এনজিচি বিষয়া পোনাৰাম মিলিকে ধৰি জিলা প্ৰশাসনৰ বহু বিষয়াৰ লগতে প্ৰায় তিনি শতাধিক অংশগ্ৰহণৰাকীয়ে।
প্ৰশিক্ষকৰ তত্বাৱধানত তেওঁলোকে ২১টা যেগাসন কৰে। সমূহীয়া যোগাসনৰ অন্তত পুৱা ৮:৩০ বজাৰ পৰা ১০:৩০ বজালৈ যোগাসন প্ৰতিযোগিতা অনুষ্ঠিত হয়।
যোগ দিৱসৰ অন্যতম কাৰ্যসূচী হিচাবে উপায়ুক্ত কাৰ্য্যালয়ৰ চুকাফা সভাকক্ষত দিনৰ ১১:৩০ বজাত এই বছৰৰ আলোচ্য বিষয় “হৃদয়ৰ বাবে যোগ” (Yoga for Heart)-ৰ ওপৰত এক আলোচনা চক্ৰৰ আয়োজন কৰা হয়। এই আলোচনা চক্ৰৰ আঁত ধৰে জিলা উপায়ুক্ত ডাঃ এছ লক্ষ্মণনে। তেল আৰু প্ৰাকৃতিক গেছ নিগমৰ গ্ৰুপ জেনেৰেল মেনেজাৰদ্বয় ক্ৰমে এছ চি ত্ৰিপাঠী আৰু ওম বীৰ সিঙে আলোচনা চক্ৰটিত আমন্ত্ৰিত অতিথিৰূপে অংশগ্ৰহণ কৰে।
আজিৰ আলোচনা চক্ৰত সমল ব্যক্তিৰূপে যোগদান কৰি স্বাস্থ্য বিভাগৰ যুটীয়া সঞ্চালক ৰিপুণ বৰপূজাৰী, হৃদৰোগ বিশেষজ্ঞ মৃণ্ময় বৰুৱা আৰু চিকিৎসা বিষয়া যদুমণি বৰাই সু-স্বাস্থ্য আৰু সুস্থ হৃদয়ৰ বাবে যোগভ্যাসৰ প্ৰয়োজনীয়তাৰ ওপৰত তথ্যসমৃদ্ধ বক্তৃতা আগবঢ়ায়।
আলোচনা চক্ৰৰ শেষত আজি অনুষ্ঠিত যোগাসন প্ৰতিযোগিতাৰ বিজয়ীসকলক পুৰস্কাৰ প্ৰদান কৰা হয়।
আলোচনা চক্ৰত অন্যান্যসকলৰ লগতে অতিৰিক্ত উপায়ুক্ত দিলীপ তেৰাং, আয়ুস (AYUSH)-ৰ নডেল বিষয়া লৱদেৱ গোস্বামী, শিৱসাগৰ চৰকাৰী উচ্চতৰ বহুমুখী বিদ্যালয়ৰ অধ্যক্ষ ৰমন শৰ্মা আৰু জিলা ক্ৰীড়া বিষয়া সঞ্জয় উপাধ্যায় উপস্থিত থাকে।
