অসম আৰক্ষীয়ে আজি হোজাই জিলাৰ ডবকাত প্ৰদৰ্শন কৰা এক চৰম অমানৱীয় তথা কাণ্ডজ্ঞানহীন আচৰণে জিলাখনৰ সৰ্বত্ৰে তীব্ৰ প্ৰতিক্ৰিয়াৰ সৃষ্টি কৰিছে।
দুৰ্ঘটনাত নিহত এগৰাকী মহিলাৰ মৃতদেহ উদ্ধাৰ কৰি যথোপযুক্ত ব্যৱস্থা গ্ৰহণ কৰাৰ পৰিৱৰ্তে আৰক্ষীয়ে গাড়ীসহ মৃতদেহটোক ক্ৰেণত লগাই প্ৰায় ৩ কিঃ মিঃ পৰ্যন্ত লৈ যায়।
উল্লেখযোগ্য যে আজি পুৱা প্ৰায় ১০ বজাত হোজাইৰ ডবকা-ডিফু বাইপাছত সংঘটিত এক ভয়ংকৰ পথ দুৰ্ঘটনাত এগৰাকী মহিলাই থিতাতে প্ৰাণ হেৰুৱাৰ লগতে আন ৩জন লোক গুৰুতৰভাৱে আঘাতপ্ৰাপ্ত হৈছিল।
ঘটনা অনুসৰি কাৰ্বি-আংলঙৰ পৰা গুৱাহাটী অভিমুখি এ এছ ১৬ বি ৭৩৭৫ নম্বৰৰ এখন ইয়ন গাড়ীক এ এছ ০২ এ চি ৫১২২ নম্বৰৰ শিল কঢ়িয়াই অনা এখন ডাম্পাৰে মহতিয়াই নিয়াত ইয়নখনৰ পিছৰ ছীটত বহি অহা মহিলাগৰাকীৰ থিতাতে মৃত্যু হয়।
দুৰ্ঘটনাৰ খবৰ পাই আৰক্ষী ঘটনাস্থলীত উপস্থিত হৈ গাড়ীকেইখনক পথৰ পৰা আঁতৰোৱাৰ লগতে গুৰুতৰভাৱে আহত লোককেইজনক ডবকা হাস্পতাললৈ প্ৰেৰণ কৰে। আহতসকলৰ ভিতৰত গাড়ীখনৰ চালক আৰু এজন পথচাৰীও আছে।
আনহাতে স্থানীয় ৰাইজে কৰা অভিযোগ মতে আৰক্ষীয়ে মহিলাগৰাকীৰ মৃতদেহসহ গাড়ীখন ক্ৰেণেৰে দাঙি ৩ কিঃ মিঃ আঁতৰত থকা ডবকা আৰক্ষী থানালৈকে লৈ যায়।
নিহত মহিলাগৰাকীক কাৰ্বি আংলং জিলাৰ হাউৰাঘাটৰ বাসিন্দা নাৰ্জাৰি খাকলাৰি বুলি চিনাক্ত কৰা হৈছে।
