উজনি অসমৰ তিনিচুকীয়াৰ পৰা আহমেদাবাদৰ জগন্নাথ মন্দিৰলৈ চাৰিটা অপ্ৰাপ্তবয়স্ক হাতী পৰিবহণৰ বাবে অসমৰ বন বিভাগে শেহতীয়াকৈ অনুমতি প্ৰদান কৰিছিল।
পশু অধিকাৰ কৰ্মীসকলে এই সিদ্ধান্তৰ তীব্ৰ বিৰোধিতা কৰিছিল, আৰু উত্তৰ ভাৰতৰ প্ৰচণ্ড গ্ৰীষ্ম প্ৰৱাহৰ মাজেৰে হাতীকেইটাৰ পৰিবহণ ৰোধৰ বাবে আনকি গুৱাহাটী উচ্চ ন্যায়ালয়ৰো দ্বাৰস্থ হৈছিল।
আশ্চৰ্য্যজনকভাৱে, ভৰপক গৰমৰ সময়ত হাতীকেইটা পৰিবহণৰ সিদ্ধান্তক লৈ অসমৰ বন মন্ত্ৰী পৰিমল শুক্লবৈদ্য বা বিভাগৰ কোনো জ্যেষ্ঠ বিষয়াই সংবাদ মাধ্যমত বক্তব্য ৰখা নাই।
বিষয়টো সন্দৰ্ভত বহুবিলাক উত্তৰ নিদিয়া প্ৰশ্ন আছে:
উত্তৰ ভাৰতৰ গ্ৰীষ্ম প্ৰৱাহৰ মাজত দুজনী মাইকীকে ধৰি চাৰিটা অপ্ৰাপ্তবয়স্ক হাতীৰ পৰিবহণ ইমান জৰুৰী কিয় আছিল?
যাত্ৰাকালত হাতীকেইটাক সুস্থ ৰখাৰ দায়িত্ব কাৰ— মালিকৰ, জগন্নাথ মন্দিৰৰ, অসমৰ বন বিভাগৰ, গুজৰাটৰ বন বিভাগৰ, পৰিবহণকাৰীৰ, নে লগত যোৱা পশু চিকিৎকসকলৰ?
ৰূপসিং নামৰ মতা অপ্ৰাপ্তবয়স্ক হাতীটোৱে বাওঁফালৰ আগভৰিত গুলীৰ আঘাত কেনেকৈ পালে?
ৰূপসিং আৰু ৰাণী নামৰ হাতী দুটা বনৰ পৰা ধৰা হৈছিল নেকি? ভৰিত গুলী কৰি ৰূপসিঙক জংঘলত কব্জা কৰা হৈছিল নেকি?
বাওঁফালৰ আগভৰিত গুলীৰ আঘাতৰ ঘাঁ থকা গুৰুতৰভাৱে খোৰা অপ্ৰাপ্তবয়স্ক মতা হাতী ৰূপসিঙক সুস্থ বুলি প্ৰমাণ পত্ৰ কিদৰে দিয়া হ’ল?
ৰূপসিঙৰ গুলীৰ ঘাঁ এতিয়াও উপশম হোৱা নাই, মাইক্ৰ’চিপ সংৰোপনৰ দিনাই হাতীটোৰ পৰিবহণৰ নিৰ্দেশ জাৰি কৰাটো ইমান জৰুৰী কিয় আছিল?
ৰূপসিং, ৰাণী আৰু বাবুলাল নামৰ অপ্ৰাপ্তবয়স্ক হাতী তিনিটাৰ তেজৰ নমুনা হায়দৰাবাদৰ চেণ্টাৰ ফৰ চেলুলাৰ এণ্ড মলিক্যুলাৰ বায়’লজিস্থিত সিহঁতৰ মাকহঁতৰ তেজৰ সৈতে ৰিজোৱাৰ বাবে অসমৰ বন বিভাগে চেষ্টা কৰিছিলনে?
২০১৮ চনৰ ৩০ ডিচেম্বৰত পৰিৱেশ আৰু বন মন্ত্ৰ্যালয়ত জমা দিয়া অসমৰ ৯০৫টা বন্দী হাতীৰ তালিকাত ৰূপসিং, ৰাণী আৰু বাবুলালৰ নাম আছিলনে?
হুকুমদাৰ খান কোন? অপ্ৰাপ্তবয়স্ক হাতী চাৰিটাক অসমৰ পৰা আহমেদাবাদৰ জগন্নাথ মন্দিৰলৈ পৰিবহণত তেওঁৰ আগ্ৰহ কি?
হুকুমদাৰ খান আহমেদাবাদৰ জগন্নাথ মন্দিৰৰ প্ৰতিনিধি দলৰ সৈতে ২৬ জুনত অসমৰ মুখ্য বন্যপ্ৰাণী ৱাৰ্দেনৰ কাৰ্য্যালয়লৈ কিয় গৈছিল?
হাতী চাৰিটা ছমাহৰ পিছত অসমলৈ ঘূৰি নাহিলে কি হ’ব? তাৰ বাবে দায়ী কোন হ’ব?
লগত যাব লগা পশু চিকিৎসকসকলৰ যাতায়াত, খোৱা-বোৱা আৰু থকাৰ খৰচ কোনে বহন কৰিব?
