দীপৰ বিলৰ পাৰত নিৰ্মাণ হ’ব লগীয়া দ্বৈত ৰে’লপথৰ বিৰুদ্ধে মঙলবাৰে স্থানীয় লোক সকলে তীব্ৰ প্ৰতিবাদ সাব্যস্ত কৰে। চলন্ত ৰে’লৰ কাষত থিয় হৈ প্ৰতিবাদকাৰী সকলে অসম চৰকাৰ হায় হায় আদি বিভিন্ন চৰকাৰ বিৰোধী শ্লোগানেৰে দীপৰ বিলৰ পাৰ উত্তাল হৈ পৰে।
উল্লেখ্য যে উত্তৰ-পূব সীমান্ত ৰে’লৱেই লোৱা সিদ্ধান্তই বিপদ মাতি আনিছে বনৰীয়া হাতী তথা স্থানীয় গাঁওসমূহলৈ। এই পৰ্যন্ত ৰে’লপথটোত বৰ্তমানলৈ ১৪ টা হাতীৰ লগতে আন আন বহুতো জীৱ-জন্তুৰ মৃত্যু হৈছে। কিন্তু ইয়াৰ পাছতো ৰে’লবিভাগৰ লগতে বনবিভাগে উচিত পদক্ষেপ লোৱাত গুৰুত্ব আৰোপ কৰা নাই।
ইয়াৰ উপৰি দ্বৈত ৰে’লপথ নিৰ্মাণৰ ফলত বনৰীয়া হাতী মৃত্যুমুখত পৰাৰ লগতে খাদ্যৰ সন্ধানত স্থানীয় অঞ্চলৰ গাঁওসমূহত যে তাণ্ডৱ চলাব সেয়া নিশ্চিত হৈ পৰিছে। আৰু যাৰ ফলত অঞ্চলটোত হাতী-মানুহৰ সংঘাতে তীব্ৰ ৰূপ ধাৰণ কৰিব।
ইফালে দ্বৈত ৰে’লপথ নিৰ্মাণে দীপৰ বিলৰ সমীপৰ মিকিৰপাৰা চকৰ্দৌ গাঁৱৰ লগতে ইয়াৰ আশে-পাশে থকা গাঁওসমূহৰ বৃহৎ ক্ষতিসাধন কৰিব। সেইবাবে দ্বৈত ৰে’লপথ নিৰ্মাণৰ বিৰুদ্ধে প্ৰতিবাদ চলি আছে আৰু কাম বন্ধ নকৰিলে প্ৰতিবাদ চলি থাকিব বুলি হুংকাৰ স্থানীয় ৰাইজৰ।
