যান্ত্ৰীক বিজুতিৰ বাবে আজি তিনিদিন ধৰি বন্ধ হৈ আছে মাজুলী-নিমাতী সংযোগী জলপথত চলা ৰ’ ৰ’ জাহাজৰ সেৱা। অত্যাধুনিক জল পৰিবহণ ব্যৱস্থাৰ অন্যতম এই ৰ’-ৰ’ত প্রায় ২০০ যাত্রী, ২৫ টন সামগ্রী কঢ়িওৱা ট্রাক তথা ২৫ খন সৰুগাড়ী পাৰাপাৰ কৰাৰ বহন ক্ষমতা আছে।
ফলত বৰ্তমান ঘণ্টাত প্ৰায় ২২ কিল’মিটাৰ বেগত চলিব পৰা এই জাহাজখন বন্ধ হৈ পৰাত পুনৰ সমস্যাৰ সন্মুখীন হৈছে মাজুলীবাসী।
সম্পূর্ণ তীখাৰে নির্মিত জাহাজখনত এটা মূল ইঞ্জিনৰ লগতে দুটা অতিৰিক্ত ইঞ্জিনৰ ব্যৱস্থা আছে যদিও ব্ৰহ্মপুত্ৰ জলপৃষ্ঠ এই বাৰিষাৰ সময়তো যথেষ্ট পৰিমানে হ্ৰাস পোৱাত বালিচৰত লাগি জাহাজখনৰ ষ্ট্ৰিয়েৰিং নষ্ট হৈছে ৷ কেন্দ্রীয় চৰকাৰৰ আভ্যন্তৰীণ জলপথ পৰিবহণে ১১ কোটি টকা ব্যয়েৰে নির্মাণ কৰা উক্ত জাহাজখন ৰাজ্যৰ জল পৰিবহণ বিভাগক অর্পণ কৰিছিল।
তিনিমিটাৰ ন্যূনতম গভীৰতাৰ জলপথত চলাচল কৰিব পৰা জাহাজখন ভাৰত চৰকাৰৰ আভ্যন্তৰীণ জলপথ প্ৰাধিকৰণে কলকতাত নিৰ্মাণ কৰি মাজুলী-নিমাতী ঘাটৰ মাজত চলাচলৰ বাবে ৰাজ্য চৰকাৰৰ আভ্যন্তৰীণ জল পৰিবহণ বিভাগক অৰ্পণ কৰিছিল।
ইতিমধ্যে কলকাতাৰ পৰা বিশেষ অভিযন্তা আহি আজি জাহাজখন মেৰামতি কৰাৰ কথা। আনহাতে ব্ৰহ্মপুত্ৰৰ বুকু বাম হৈ পৰাত মাজুলী নিমাতীত চলা অন্যান্য যাত্ৰীবাহী ফেৰী সমূহো চলাচলত সমস্যাৰ সৃষ্টি হৈছে।
