ভাৰতীয় জনতা পাৰ্টিয়ে শনিবাৰৰ পৰা অৰ্থাৎ ৬ জুলাইৰ পৰা দেশজুৰি আৰম্ভ কৰিছে সদস্য ভৰ্তি অভিযান। সমান্তৰালভাৱে শিৱসাগৰ জিলা বিজেপিয়েও শনিবাৰে শিৱসাগৰ জিলা বিজেপিৰ মুখ্য কাৰ্যালয়ত শিৱসাগৰ বিধানসভা সমষ্টিত এক সদস্য ভৰ্তি অভিযান আৰম্ভ কৰে।
শিৱসাগৰ জিলা বিজেপিৰ সভানেত্ৰী সুৰভী ৰাজকুৱঁৰীৰ সভাপতিত্বত অনুষ্ঠিত হোৱা যোগদান সভাত মুখ্য অতিথি হিচাপে অংশগ্ৰহণ কৰি বিজেপি দলৰ ৰাষ্ট্ৰীয় কাৰ্যনিৰ্বাহক সদস্য তথা এ পি জি চি এলৰ অধ্যক্ষ অনুপ সিং ৰাজপুৰুহিতে কয় দেশৰ প্ৰতিগৰাকী জনসাধাৰণৰ উন্নয়নৰ বাবে বিজেপি চৰকাৰে সম উন্নয়ন আৰু সম বিকাশৰ বাবে আঁচনি গ্ৰহণ কৰিছে। বিজেপিৰ বিকাশৰ ৰাজনীতিৰ প্ৰতি আকৃষ্ট হৈ সকলো শ্ৰেণীৰ ৰাইজে বিজেপি দলক আঁকোৱালি লৈছে।
কংগ্ৰেছ দলক পৰিয়ালকেন্দ্ৰিক দল আৰু জনসাধাৰণক শোষণ কৰা দল বুলি অভিহিত কৰি ৰাজপুৰুহিতে আৰু কয় কংগ্ৰেছ হৈছে নকল গান্ধীৰ দ্বাৰা পৰিচালিত দল। শিৱসাগৰ বিধানসভা সমষ্টিত বিজেপি দলত যোগদান কৰা লোকসকলৰ উৎসাহ দেখি অহা বিধানসভা নিৰ্বাচনত ঐতিহাসিক শিৱসাগৰ বিধানসভা সমষ্টিত বিজেপি দলৰ প্ৰাৰ্থী ২০ হাজাৰৰো অধিক ভোটত জয়ী হ’ব বুলি তেওঁ উল্লেখ কৰে।
লগতে পুৰোহিতে কয় যে শিৱসাগৰ সমষ্টি কংগ্ৰেছৰ অকৰ্মণ্য বিধায়ক প্ৰণৱ গগৈৰ বাবেই শিৱসাগৰ বিধানসভা সমষ্টি ৰাজ্যৰ ১২৬ সমষ্টিৰ ভিতৰত পিছুৱাই গৈছে।
শিৱসাগৰ জিলা বিজেপিৰ কাৰ্যালয় সম্পাদক সমীৰ দত্তই উদ্দেশ্য ব্যাখ্যা কৰা যোগদান সভাত শিৱসাগৰ বিধানসভা সমষ্টিৰ অন্তৰ্গত তিনি শতাধিক সংখ্যালঘু সম্প্ৰদায়ৰ লোকৰ লগতে আন কেইবাটাও সংগঠন আৰু অন্যান্য লোকৰ লগতে পাঁচ শতাধিক লোকে বিজেপি দলত আনুষ্ঠানিকভাৱে যোগদান কৰে।
ইফালে বেতবাৰী গাঁও পঞ্চায়তৰ ১০ নং ৱাৰ্ডৰ ৱাৰ্ড সদস্য মাণিক তাঁতীয়ে আজি বিজেপি দলত যোগদান কৰে । উল্লেখযোগ্য যে যোৱা পঞ্চায়ত নিৰ্বাচনত বেতবাৰী গাঁও পঞ্চায়তত বিজেপি দলৰ চাৰিগৰাকী ৱাৰ্ড সদস্য জয়ী হোৱাৰ বিপৰীতে কংগ্ৰেছ দলৰ পৰা ছয়গৰাকী ৱাৰ্ড সদস্য বিজয়ী হৈছিল।
ইয়াৰে কংগ্ৰেছৰ ৫ নং ৱাৰ্ডৰ সদস্য মৰমী গগৈয়ে যোৱা ১৩ এপ্ৰিলত কংগ্ৰেছৰ পৰা বিজেপি দলত যোগদান কৰাৰ পাছত আজি পুনৰ কংগ্ৰেছৰ ৱাৰ্ড সদস্য মাণিক তাঁতীয়ে বিজেপিত যোগদান কৰাৰ পাছতেই বিজেপি দলৰ ৱাৰ্ড সদস্যৰ সংখ্যা ৬ জনলৈ বৃদ্ধি পোৱাত বেতবাৰী পঞ্চায়তৰ উপ সভাপতিৰ পদটো বিজেপিৰ দখললৈ যোৱাটো নিশ্চিত হৈ পৰিল।
