অসমৰ নিৰাময়হীন বছেৰেকীয়া দুৰ্য্যোগৰূপী বানৰ কবলত পৰিছে ৰাজ্যৰ ১১খন জিলাৰ ২ লাখতকৈয়ো অধিক লোক।
বানপানী আৰু নেৰানেপেৰা বৰষুণৰ লগতে হোৱা ভূমিস্খলনত বুধবাৰ-পৰ্য্যন্ত প্ৰাণ হেৰুৱাইছে তিনিজনকৈ লোকে।
ধেমাজি আৰু গোলাঘাটৰ দুজন ব্যক্তিয়ে বানত প্ৰাণ হেৰুওৱাৰ বিপৰীতে গুৱাহাটীত হোৱা ভূমিস্খলনত নিহত হৈছে এজন লোক।
অসম ৰাজ্যিক দুৰ্য্যোগ ব্যৱস্থাপনা প্ৰাধিকৰণৰ তথ্য মতে বুধবাৰলৈকে অসমৰ বান আক্ৰান্ত জিলাকেইখনৰ ৫৩০খন গাওঁ পানীত ডুবিছে।
“ধেমাজি, লখিমপুৰ, বিশ্বনাথ, দৰং, বৰপেটা, নলবাৰী, চিৰাং, গোলাঘাট, মাজুলী, যোৰহাট আৰু ডিব্ৰুগড় জিলাৰ ২৪টা ৰাজহ চক্ৰৰ ৫৩০খন গাওঁ বানত আক্ৰান্ত হৈছে,” প্ৰাধিকৰণৰ বিষয়াই জনায়।
তেওঁ লগতে জনাই যে চলিত বানত ৰাজ্যৰ মুঠ ২,০৭,০৯৮গৰাকী লোক আক্ৰান্ত হৈছে।
বিস্তীৰ্ণ খেতিভূমি পানীৰ তলত ডুব গৈছে। অধিক পানীৰ ফলত বান নোহোৱা অঞ্চলৰ খেতিপথাৰতো এতিয়ালৈকে ভূঁই ৰোৱা আৰম্ভই কৰিব পৰা নাই বহু খেতিয়কে। মানুহৰ লগতে গৰু-ছাগলী আদি পশুধনৰো আলাই-আথানি হৈছে।
ৰাজ্যিক দুৰ্য্যোগ ব্যৱস্থাপনা প্ৰাধিকৰণৰ তথ্য মতে ধেমাজি, লখিমপুৰ, গোলাঘাট আৰু যোৰহাট জিলাত ১৩টা আশ্ৰয় শিবিৰ আৰু ১০টা সাহায্য বিতৰণ কেন্দ্ৰ স্থাপন কৰা হৈছে।
কিন্তু বিভাগীয় তথ্য মতে, বৃহৎসংখ্যক আক্ৰান্ত লোক থকা অৱস্থাত কেৱল ২৪৯গৰাকী লোকহে বুধবাৰলৈকে আশ্ৰয় শিবিৰত আছে।
ইফালে ব্ৰহ্মপুত্ৰকে ধৰি অসমৰ বহুকেইখন নদী বৰ্তমান বিপদসীমাৰ ওপৰেৰে বৈ আছে।
কেন্দ্ৰীয় জল আয়োগৰ তথ্য মতে, যোৰহাট আৰু তেজপুৰত ব্ৰহ্মপুত্ৰ বিপদসীমাৰ ওপৰেৰে বৈ থকাৰ লগতে শিৱসাগৰত দিখৌ, গোলাঘাটত ধনশিৰি, শোণিতপুৰত জীয়া ভৰলী আৰু বৰপেটাত বেঁকী নৈৰ জলস্তৰ বিপদসীমাৰ ওপৰত।
বানাক্ৰান্ত অঞ্চলসমূহত সাহায্য আৰু উদ্ধাৰ অভিযানত এন ডি আৰ এফ আৰু এছ ডি আৰ এফক নিয়োগ কৰা হৈছে।
বান পৰিস্থিতি আৰু অধিক বেয়াৰ ফালে ঢাল খোৱাৰ আশংকা কৰা হৈছে।
ন ন অঞ্চল প্লাৱিত হোৱাৰ খবৰ আহি থকাৰ সময়তে বতৰ বিজ্ঞান বিভাগে অসমকে ধৰি উত্তৰ-পূবত আৰু অধিক বৰষুণৰ আগজাননী দিছে।
