বিগত কিছুদিন ধৰি চুবুৰীয়া ৰাজ্য অৰুণাচল প্ৰদেশৰ লগতে অসমত হোৱা নেৰানেপেৰা বৰষুণৰ ফলত ব্ৰহ্মপুত্ৰৰ লগতে উত্তৰ অসমৰো প্ৰায়বোৰ উপনৈৰে পানী ফেনে-ফোঁটোকাৰে উপচি পৰিছে।
আজি দুপৰীয়া পৰ্যন্ত বিশ্বনাথ জিলাৰ মুঠ ৭৭ খনকৈ ৰাজহ গাঁও বৰলুইতৰ বাঢ়নি পানীৰ কবলত কৰিছে। বিশ্বনাথ ৰাজহ চক্ৰৰ ৯খন, গহপুৰৰ ২৯খন আৰু হেলেম ৰাজহ চক্ৰৰ ৩৯খন গাঁৱৰ ৪২ হাজাৰৰো অধিক লোক বানত ক্ষতিগ্ৰস্ত হৈছে।
ইয়াৰ মাজতে বিশ্বনাথ জিলা প্ৰশাসন আৰু গহপুৰ মহকুমা প্ৰশাসনৰ তৎপৰতাত এন ডি আৰ এফৰ দ্বাদশ বেটেলিয়ন আৰু এছ ডি আৰ এফৰ জোৱানসকলে অব্যাহত ৰাখিছে বানপীড়িত এলেকাত আবদ্ধ লোকসকলক উদ্ধাৰৰ কাম ।
হেলেম ৰাজহ চক্ৰৰ ডাঠকলাত ইতিমধ্যেই এটা আশ্ৰয় শিবিৰ মুকলি কৰা হৈছে, য’ত আজি সন্ধিয়ালৈ মুঠ ২২৯ গৰাকী লোকে আশ্ৰয় গ্ৰহণ কৰিছে। ইয়াৰে ৯৩ গৰাকী পুৰুষ আৰু ১৩৬ গৰাকী মহিলা।
আনহাতে জিলাখৰ উপায়ুক্তৰ নিৰ্দেশত বানপীড়িত ৰাইজৰ মাজত খাদ্য আৰু সংশ্লিষ্ট সাহায্য সামগ্ৰী বিতৰণ অব্যাহত ৰখাৰ লগতে আশ্ৰয় শিবিৰৰ আৱাসীসকলৰ স্বাস্থ্য পৰীক্ষা কৰা হৈছে বুলি জিলা প্ৰশাসনৰ ফালৰ পৰা জনোৱা হৈছে। তদুপৰি বানাক্ৰান্ত এলেকাত প্ৰাদুৰ্ভাৱ ঘটিব পৰা ৰোগ প্ৰতিৰোধৰ বাবে স্বাস্থ্য বিভাগক সাজু হৈ থাকিবলৈ নিৰ্দেশ দিয়াৰ লগতে পোহনীয়া জীৱ-জন্তুৰ স্বাস্থ্যৰ তদাৰকীৰ বাবে পশুপালন আৰু পশু চিকিৎসা বিভাগক যাৱতীয় ব্যৱস্থা গ্ৰহণ কৰিবলৈ কোৱা হৈছে।
জৰুৰীকালীন পৰিস্থিতিত যোগাযোগৰ বাবে জিলা দুৰ্যোগ ব্যৱস্থাপনা কৰ্তৃপক্ষৰ সৌজন্যত ইতিমধ্যেই ২৪ ঘণ্টাই সক্ৰিয় এক নিয়ন্ত্ৰণ কক্ষ মুকলি কৰা হৈছে। যোগাযোগৰ নম্বৰসমূহ হৈছে ০৩৭১৫-৮৮৮০৮৬, +৯১-৬০০২৬৬৮৮৭৩ আৰু টোল ফ্ৰী নম্বৰ ১০৭৭।
তিনিচুকীয়া জিলাত বানত আক্ৰান্ত ৬৩খন গাঁৱৰ প্ৰায় ৫০ হাজাৰ লোক
চলিত বানত তিনিচুকীয়া জিলাৰ তিনিচুকীয়া, ডুমডুমা আৰু শদিয়া ৰাজহ চক্ৰৰ মুঠ ৬৩খন গাঁৱৰ প্ৰায় ৫০ হাজাৰ লোক আক্ৰান্ত হৈছে৷ তিনিচুকীয়া ৰাজহ চক্ৰৰ ১৪, ডুমডুমাৰ ৩২ আৰু শদিয়া ৰাজহ চক্ৰৰ ১৭খন গাওঁ বানত প্লাৱিত হৈছে৷
প্ৰশাসনে প্ৰকাশ কৰা তথ্য অনুসৰি তিনিচুকীয়া ৰাজহ চক্ৰৰ ৪২ হেক্টৰ আৰু ডুমডুমা ৰাজহ চক্ৰৰ ৫২৭হেক্টৰ কৃষি ভূমি বানত ক্ষতিগ্ৰস্ত হৈছে।
তিনিচুকীয়া আৰু ডুমডুমা ৰাজহ চক্ৰ এলেকাত প্ৰশাসনে ইতিমধ্যে স্থাপন কৰিছে ১৬টা আশ্ৰয় শিবিৰৰ লগতে ৬টাকৈ সাহৰ্য্য কেন্দ্ৰ। ইয়াৰে ১৬টা আশ্ৰয় শিবিৰত ৮৩১৫ গৰাকী বন্যাক্ৰান্তই আশ্ৰয় লোৱা বুলি প্ৰশাসনৰ সূত্ৰত প্ৰকাশ৷
ইপিনে আজি তৃতীয় দিনাও জিলাখনৰ বান পৰিস্থিতি অপৰিৱৰ্তিত হৈ আছে। যোৱা নিশা বাঢ়নীপানী কিছু হ্ৰাস হৈছিল যদিও আজি পুনৰ পানী বৃদ্ধি পোৱা বুলি জানিব পৰা গৈছে।
