এন আৰ চিৰ দাবী আপত্তি বিচাৰৰ নামত সাম্প্ৰতিক অসমত সাধাৰণ নাগৰিকক হাৰাশাস্তি কৰাৰ প্ৰসংগ উত্থাপন কৰি ৰাজ্যখনৰ জনসাধাৰণক বিপন্ন জনৰ কাষত থিয় হ’বলৈ আহ্বান জনাইছে দুই শতাধিক ঘাইসূঁতিৰ সচেতন নাগৰিকে।
গুৱাহাটী প্ৰেছ ক্লাৱত বুধবাৰে বিশিষ্ট সাহিত্যিক, শিক্ষাবিদ, সমাজকৰ্মীকে ধৰি দুই শতাধিক নাগৰিকৰ স্বাক্ষৰৰে অসমৰ ৰাইজলৈ এই আহ্বান জনাইছে ঘাইসূঁতিৰ সচেতন নাগৰিক মঞ্চই।
নিৰুপমা বৰগোহাঞি, ড° অৰূপা পটংগীয়া কলিতা, তোষপ্ৰভা কলিতা, দিৱস ফুকন আদি বহুতো বিশিষ্ট ব্যক্তি শিক্ষাবিদে অংশগ্ৰহণ কৰা সংবাদমেলখনত বিশিষ্ট ব্যক্তিসকলে ৰাইজক নাগৰিক পঞ্জীৰ নামত হাৰাশাস্তি হোৱা মানুহৰ মাজত থিয় হোৱাৰ আহ্বান জনায় ।
এন আৰ চি, ডি ভোটাৰ আদিৰ নামত সঘনাই মানৱ অধিকাৰ উলংঘনৰ ঘটনাক লৈও তেওঁলোকে উদ্বেগ প্ৰকাশ কৰে।
এই সন্দৰ্ভত বিশিষ্ট লেখিকা ড° অৰুপা পটংগীয়াই কয়, ‘’ অসমীয়া ঘাইসূঁতিৰ মানুহে সদায় বিপন্ন জনৰ কাষত থিয় হোৱাৰ ইতিহাস আছে আৰু আজিও আমি এই ইতিহাস আগুৱাই নিব লাগিব। এন আৰ চি আমাক লাগিব সেইটো হয়। কিন্তু বাংলাদেশী বাংলাদেশী কৰি থকা এই ৰাজনীতি শেষ হ’ব লাগে।‘’
ছাত্র জীৱনৰে পৰা বিদেশী খেদা আন্দোলনৰ সৈতে জড়িত আঞ্চলিকতাবাদী নেতা দিৱস ফুকনে কয়, ‘’বিদেশী বিতাড়নৰ কোনো বাস্তৱ নীতি নথকা চৰকাৰে বিদেশীৰ সমস্যাক লৈ কেৱল ৰাজনীতি কৰি আহিছে।‘’
এন আৰ চিৰ হৈ মাত মাতি অহা হৰ কুমাৰে কয়, ‘’ষড়যন্ত্ৰমূলকভাৱে এন আৰ চি প্ৰক্ৰিয়া দীৰ্ঘায়িত কৰিব বিচাৰিছে চৰকাৰে। চৰকাৰৰ উদ্দেশ্য মানুহক ভীতিগ্ৰস্ত কৰি ৰখা।‘’
আনহাতে, সংবাদমেল যোগে ঘাইসূঁতিৰ অসমীয়া সচেতন নাগৰিক মঞ্চই ডিটেনশ্যন কেম্পৰ দৰে অমানৱীয় ব্যৱস্থা বন্ধ কৰা, স্বদেশীক বিদেশী সজোৱাৰ ষড়যন্ত্ৰ বন্ধ কৰা, সকলো ভাৰতীয় নাগৰিককে এন আৰ চিত অন্তৰ্ভুক্ত কৰা আদি কিছুমান দাবী উত্থাপন কৰে।
উল্লেখ্য যে অসমৰ আগশাৰীৰ সাহিত্যিক, শিক্ষাবিদ, সমাজকৰ্মীয়ে স্বাক্ষৰ প্ৰদান কৰা গোহাৰি পত্ৰখনত নীলমণি ফুকন, ড° হীৰেণ গোঁহাই, নিৰুপমা বৰগোহাঞি, তোষপ্ৰভা কলিতাকে ধৰি দুই শতাধিক ব্যক্তিয়ে স্বাক্ষৰ প্ৰদান কৰে।
