প্ৰধান মন্ত্ৰী নৰেন্দ্ৰ মোডীয়ে আগষ্ট মাহৰ প্ৰথম ভাগতে ভূটান ভ্ৰমণ কৰাৰ সম্ভাৱনা আছে। মোডীৰ এই ভ্ৰমণত পৰম্পৰাগত নিকট দ্বিপাক্ষিক সম্পৰ্ক উন্নীত কৰাৰ লক্ষ্যৰ লগতে ‘চুবুৰীয়া ৰাষ্ট্ৰ প্ৰথম’ নীতিৰ ওপৰত গুৰুত্ব আৰোপ কৰা হ’ব।
বৈদেশিক মন্ত্ৰী এছ জয়শংকৰে যোৱা জুন মাহত কাৰ্যবাৰ গ্ৰহণ কৰাৰ পাছতে তেওঁৰ প্ৰথমটো বিদেশ ভ্ৰমণত ভূটানলৈ গৈছিল। ভাৰতৰ সৈতে লাগি থকা চুবুৰীয়া ৰাষ্ট্ৰখনৰ প্ৰতি থকা ভাৰতৰ গুৰুত্বৰ কথাটো উক্ত ভ্ৰমণত প্ৰতিফলিত হোৱা বুলি মন্ত্ৰালয়ৰ তৰফৰ পৰা সদৰী কৰা হৈছিল।
প্ৰধান মন্ত্ৰী মোডীৰ ভ্ৰমণৰ বাবে বৈদেশিক মন্ত্ৰী জয়শংকৰে ভেটি প্ৰস্তুত কৰি আহিছিল আৰু প্ৰধান মন্ত্ৰীৰ ভ্ৰমণত তাৰ প্ৰতিফলন ঘটাৰ সম্ভাৱনা আছে। মোডীৰ ভ্ৰমণে ভূটানৰ অৰ্থনৈতিক বিকাশৰ পৰিকল্পনাত সহযোগিতাৰ পৰা আৰম্ভ কৰি জলবিদ্যুতৰ ক্ষেত্ৰত সহযোগিতাৰ দিশটোকো সামৰি ল’ব।
উল্লেখযোগ্য যে মোদীয়ে প্ৰথমবাৰ প্ৰধান মন্ত্ৰী হিচাপে কাৰ্যভাৰ গ্ৰহণ কৰাৰ পাছতে প্ৰথমে ভূটানলৈ গৈছিল।
২০১৭ চনত ডোকলামত চীনৰ সমৰসজ্জাৰ বিষয়টোৱেও ভাৰত-ভূটানৰ মাজত দৃঢ় সম্বন্ধ প্ৰতিষ্ঠাৰ গুৰুত্ব বৃদ্ধি কৰিছে। যোৱা বছৰ নিৰ্বাচনৰ পাছতে লোটে শ্বেৰিঙে প্ৰথম ভাৰত ভ্ৰমণ কৰাৰ বিষয়টোৱেও দেশখনৰ ভাৰতৰ সৈতে সম্পৰ্ক বৃদ্ধি কৰাৰ ইচ্ছা প্ৰতিফলিত কৰে।
কৌশলগতভাৱে, ভাৰত-ভূটানৰ মাজৰ দ্বিপাক্ষিক সম্পৰ্ক উন্নীত হোৱাটো দেশ দুখনৰ বাবে অতি প্ৰয়োজনীয় বুলি বিবেচিত হৈ আহিছে।
