অসমীয়া ৰহস্য সাহিত্য জগতত অভিলেখ সৃষ্টিকাৰী ‘দস্যু ভাস্কৰ’ ছিৰিজৰ লিখক ৰবীন দে ওৰফে ৰংমনৰ আজি মৃত্যু বাৰ্ষিকীত তেওঁৰ অনুৰাগী তথা গুণমুগ্ধসকলে তেওঁক স্মৰণ কৰিছে।
অসমত জন্মগ্ৰহণ কৰা ৰবীন দে পাছলৈ কলকাতাত নিগাজীকৈ থাকিবলৈ লৈছিল। ৰংমন ছদ্মনামত লিখা তেওঁৰ ৰহস্যঘন ‘দস্যু ভাস্কৰ’ ছিৰিজে অসমত জনপ্ৰিয়তাৰ শীৰ্ষত আৰোহন কৰিছিল।
বৰ্তমানলৈকে অসমত এনেধৰণৰ ৰহস্য ছিৰিজ বিক্ৰীৰ অভিলেখ দস্যু ভাস্কৰে অক্ষুন্ন ৰাখিছে। দস্য ভাস্কৰ ছিৰিজৰ মুঠতে ৬২ টা খণ্ড প্ৰকাশ পাইছিল আৰু ইয়াৰ প্ৰথম খণ্ডটো আছিল ‘দস্যু ভাস্কৰৰ আৱিৰ্ভাৱ’।
‘দস্যু ভাস্কৰ’ ছিৰিজৰ খণ্ডসমূহৰ ভিতৰৰ আন কেইটামান আছিল ‘গুহা মানৱ ভাস্কৰ’, ‘চক্ৰভেদী ভাস্কৰ’,’বিমান যুদ্ধত ভাস্কৰ’, ‘ দস্যু ভাস্কৰৰ অন্তৰ্ধান’, ‘ দস্যু ভাস্কৰ আৰু অদৃশ্য মানৱ’, ‘অস্থিৰ সীমান্ত আৰু দস্যু ভাস্কৰ’, ‘ভাস্কৰৰ প্ৰতিজ্ঞা পূৰণ’, ‘বন্ধু ভাস্কৰ’ ইত্যাদি।
দস্যু ভাস্কৰ ছিৰিজৰ উপৰি ৰংমনে ‘ডাকু’ ‘পবন কোঁৱৰ’ আৰু ‘পৰ্বতৰ ৰেঙণি’ আদি শিশু উপযোগী উপন্যাস ৰচনা কৰিছিল। তেওঁৰ এখন সামাজিক উপন্যাস ‘নিপাতৰ পাত’ আমাৰ প্ৰতিনিধি আলোচনীত ধাৰাবাহিকভাৱে প্ৰকাশ পাইছিল যদিও উপন্যাসখন অসম্পূৰ্ণ হৈ ৰয়।
ৰবীন দে ১৯২২ চনৰ ১৮ মাৰ্চত অসমৰ শিৱসাগৰৰ নাজিৰাৰ দিখৌ নৈৰ কাষৰ এটি বঙালী পৰিয়ালত জন্মগ্ৰহণ কৰিছিল। তেওঁ নাজিৰাত পঢ়া শুনা কৰি ১৯৪৩ চনত মেট্ৰিক পৰীক্ষাত উত্তীৰ্ণ হোৱাৰ পাছত কলকাতা বিশ্ববিদ্যালয়ৰ অধীনৰ স্কটিছ চাৰ্চ কলেজত অধ্যয়ন কৰিছিল।
১৯৬০ চনত ৰবীন দেই কলকাতাত তেতিয়াৰ ছোভিয়েট দেশ আলোচনীৰ অসমীয়া সংস্কৰণত যোগদান কৰিছিল। তেওঁ এগৰাকী অভিনেতাও আছিল।
সত্তৰ আৰু আশীৰ দশকত অসমীয়া পাঠকৰ নিদ্ৰা হৰণ কৰি ৰহস্য সাহিত্যৰ মাজলৈ তীব্ৰ আকৰ্ষণৰ সৃষ্টি কৰিবলৈ সক্ষম হোৱা ৰবীন দে ওৰফে জনপ্ৰিয় ৰংমনৰ ১৯৮০ চনৰ ২২ জুলাইত দেহাৱসান ঘটে।
অসমীয়া ৰহস্য সাহিত্যৰ অপ্ৰতিদ্বন্দ্বী কলাকাৰগৰাকীৰ আজি মৃত্যু বাৰ্ষিকীত অসমবাসীয়ে জনাইছে একাঁজলি শ্ৰদ্ধাঞ্জলি।
