’৯৯ৰ কাৰ্গিল যুদ্ধৰ ভাৰতজুৰি চলা স্মৃতিচাৰণৰ সমান্তৰালকৈ তেজপুৰতো ভাৰতীয় সেনাৰ গজৰাজ ক’ৰে শুকুৰবাৰে উদযাপন কৰিছে “বিজয় দিৱস”।
৪ ক’ৰৰ গেৰিছনস্থিত গজৰাজ যুদ্ধ স্মাৰকত আয়োজিত অনুষ্ঠানটোত জি অ’ চি (General officer commanding) লেফটেনেণ্ট জেনেৰেল মনোজ পান্দেৰ লগতে সৈনিকসকলে কাৰ্গিলৰ চহিদ জোৱানসকললৈ শ্ৰদ্ধাঞ্জলি নিবেদন কৰে।
১৬০০০ ফুটতকৈয়ো অধিক উচ্চতাত হিমালয়ৰ বুকুত পাকিস্তানৰ বিৰুদ্ধে চলা “অপাৰে’চন বিজয়”ৰ তাৎপৰ্য্য অনুষ্ঠানটোত জি অ’ চিজনে ব্যাখ্যা কৰে।
“কাৰ্গিল যুদ্ধক ভাৰতীয় সেনাৰ সাহস আৰু সংকল্পবদ্ধতাৰ সাক্ষ্যৰূপে গণ্য কৰা হয়, য’ত সৈনিকসকলে কাৰ্গিলৰ উচ্চ পৰ্বতত অমানৱীয় উষ্ণতাত সকলো প্ৰতিকূলতা নেওচি অদম্য সাহস, দৃঢ়তা আৰু বীৰত্ব প্ৰদৰ্শন কৰিছিল,” তেওঁ কয়।
কাৰ্গিলৰ নিৰ্ণায়ক বিজয়লৈ আঙুলিয়াই লেফটেনেণ্ট জেনেৰেল পান্দেই সকলো সৈনিককে প্ৰতিনিয়ত যিকোনো প্ৰত্যাহ্বানৰ বাবে সাজু থাকিবলৈ আহ্বান জনায়।
আৰু, এই কঠিন পথত তেওঁ সেনাৰ অৱসৰপ্ৰাপ্ত সৈনিক আৰু চহিদসকলক প্ৰেৰণাৰূপে ল’বলৈয়ো সৈনিকসকলক আহ্বান জনায়।
তেজপুৰৰ উপৰি ৰঙিয়া, মিছামাৰী অৰুণাচল প্ৰদেশৰ টেঙাত থকা সেনা বেষ্টনিসমূহতো বিজয় দিৱস পালন কৰা হয়।
তেজপুৰৰ অনুষ্ঠানটোত শোণিতপুৰৰ জিলা উপায়ুক্ত আৰু তেজপুৰ চিকিৎসা মহাবিদ্যালয় হস্পিটেলৰ অধ্যক্ষও উপস্থিত আছিল।
অনুষ্ঠানৰ পিছতে অসমৰ চলিত বানত সেনা বাহিনীয়ে আগবঢ়োৱা সেৱাৰ বিষয়ে সাংবাদিকসকলক জি অ’ চিজনে অৱগত কৰে।
তেওঁ জনাই যে অসমত বানাক্ৰান্তক সহায় কৰাৰ বাবে সেনাৰ ১৫টা গোট নিয়োজিত হৈ আছে আৰু তেওঁলোকে এতিয়ালৈকে ৪০০০তকৈ অধিক লোকক স্থানান্তৰ হোৱাত সহায় কৰিছে।
তাৰোপৰি বানাক্ৰান্ত লোক আৰু জীৱ-জন্তুসমূহক সেনাই চিকিৎসা সেৱাও আগবঢ়াইছে।
এতিয়ালৈকে প্ৰায় ৩০০০ জীৱ-জন্তু উদ্ধাৰ কৰা হৈছে। মানুহ আৰু জীৱ-জন্তুসমূহৰ বাবে আমি স্বাস্থ্য শিবিৰ আয়োজন কৰিছো। ভাৰতীয় সেনাই ইয়াৰ সৰ্বোত্তম সহায় আগবঢ়োৱাৰ চেষ্টা কৰিছে,” তেওঁ কয়।
পাকিস্তানী সেনাক আঁতৰাই কাশ্মীৰৰ হেৰুওৱা দখলসমূহ উদ্ধাৰৰ দিন ২৬ জুলাইতো ভাৰতীয় সেনাই “বিজয় দিৱস”ৰূপে পালন কৰি আহিছে।
১৯৯৯ চনৰ মে’ৰ পৰা জুলাইলৈকে ভাৰত আৰু পাকিস্তানী সেনাৰ মাজত বহুকেইটা সংঘৰ্ষ সংঘটিত হৈছিল।
পাকিস্তানী সেনাৰ বিৰুদ্ধে ভাৰতীয় স্থল আৰু বায়ু সেনাই যুটীয়া অভিযান চলাইছিল।
যুদ্ধখনত ৫২৭গৰাকী ভাৰতীয় সেনাই প্ৰাণ হেৰুৱাইছিল।
