ৰাষ্ট্ৰীয় স্বয়মসেৱক সংঘই এখন আৰ্মি স্কুল স্থাপনৰ কাম পূৰ্ণগতিত আৰম্ভ কৰিছে।
খবৰ মতে, উত্তৰ প্ৰদেশৰ বুলন্দশ্বেহেৰত নিৰ্মীয়মান এই বিদ্যালয়ত অধ্যয়নৰ বাবে সংগঠনটোৱে চলিত মাহৰ পৰা আবেদন আহ্বান কৰিব।
ভাৰতীয় সেনা বাহিনীসমূহত ভৰ্তি হোৱাৰ বাবে বিদ্যাৰ্থীসকলক প্ৰস্তুত কৰি তোলাৰ বাবে সোঁপন্থী সংগঠনটোৱে এই বিদ্যালয়খন আৰম্ভ কৰিছে।
বাতৰি মতে, অহা বছৰ এপ্ৰিলত পাঠদান আৰম্ভ হ’ব লগা বিদ্যালয়খনৰ প্ৰথমটো শ্ৰেণীত ১৬০খন আসন থাকিব।
ইয়াৰে ৫৬খন আসন কৰ্তব্যৰত অৱস্থাত মৃত্যু হোৱা ভাৰতীয় সৈনিকৰ পুত্ৰসকলৰ বাবে সংৰক্ষিত হ’ব।
বিদ্যালয়খন আৰ এছ এছৰ শিক্ষা গোট বিদ্যা ভাৰতীৰ অধীনত পৰিচালিত হ’ব।
বুলন্দশ্বেহেৰৰ শ্বিকাৰপুৰত ২০ বিঘা মাটিত সম্পূৰ্ণ আৱাসিক বিদ্যালয়ৰূপে গঢ়িব লগা এই বিদ্যালয়ে চি বি এচ ই পাঠ্যক্ৰম আগবঢ়াব।
ষষ্ঠ মানৰ পৰা দ্বাদশ শ্ৰেণীলৈকে এই বিদ্যালয়ে পাঠ্যক্ৰম আগবঢ়াব।
প্ৰাক্তন সৈনিক ৰাজপাল সিঙে সংঘক দান দিয়া মাটিত যোৱা আগষ্টৰ পৰা বিদ্যালয়খনৰ নিৰ্মাণ চলি আছে।
বিদ্যালয়খনৰ নাম ৰখা হৈছে ৰাজ্জু ভাইয়া সৈনিক বিদ্যা মন্দিৰ।
আৰ এছ এছৰ প্ৰাক্তন সৰসংঘচালক (সৰ্বাধিনায়ক) ৰাজেন্দ্ৰ সিঙৰ নামত বিদ্যালয়খন উচৰ্গা কৰা হৈছে।
ৰাজেন্দ্ৰ সিং বা ৰাজ্জু ভাইয়া আছিল সংগঠনটোৰ প্ৰথম “অ-ব্ৰাহ্মণ” আৰু “অ-মাৰাঠী” সৰসংঘচালক।
বুলন্দশ্বেহেৰ ৰাজেন্দ্ৰ সিঙৰ জন্মস্থান। ২০০৩ চনত মৃত্যু হোৱা ৰাজেন্দ্ৰ সিং ১৯৯৪ৰ পৰা ২০০০ চনলৈকে সংঘৰ সৰসংঘচালক আছিল।
বিদ্যা ভাৰতীৰ পশ্চিম উত্তৰ প্ৰদেশ আৰু উত্তৰাখণ্ড অঞ্চলৰ আঞ্চলিক সমন্বয়ক অজয় গোৱেলৰ উদ্ধৃতিৰে প্ৰকাশিত বাতৰি মতে, বিদ্যালয়খন পৰীক্ষামূলকভাৱে আৰম্ভ কৰিবলৈ লোৱা হৈছে।
এই পৰীক্ষা সফল হ’লে দেশৰ আন ঠাইটো অনুৰূপ বিদ্যালয় সংঘই স্থাপন কৰিব, গোৱেলে জনায়।
অসমত শংকৰদেৱ শিশু/ বিদ্যা নিকেতনসমূহ পৰিচালনা কৰা বিদ্যা ভাৰতীৰ অধীনত সমগ্ৰ ভাৰতত প্ৰায় ১২০০০ স্কুল চলি আছে।
২০১৬ চনত এই বিদ্যালয়সমূহত পঢ়ি থকা শিক্ষাৰ্থীৰ সংখ্যা আছিল প্ৰায় ৩০ লাখ।
আৰ এছ এছৰ উদ্যোগত স্থাপিত হ’ব লগা এই বিদ্যালয়খনেই হ’ব দেশৰ প্ৰথমখন বেচৰকাৰী সৈনিক বিদ্যালয়।
বৰ্তমান ভাৰতৰ থকা সৈনিক বিদ্যালয়সমূহ প্ৰতিৰক্ষা মন্ত্ৰ্যালয়ে যোগান ধৰা ৰাজহুৱা পুঁজিত চলে।
জৱাহৰলাল নেহৰু চৰকাৰৰ প্ৰতিৰক্ষা মন্ত্ৰী ভি কে কৃষ্ণ মেননৰ সৃষ্টি এই সৈনিক বিদ্যালয়সমূহ সৈনিক বিদ্যালয় সমাজে পৰিচালনা কৰি আহিছে।
