টীম ইণ্ডিয়াৰ ‘হিটমেন’ ৰোহিত শৰ্মাই ৱেষ্ট ইণ্ডিজৰ বিৰুদ্ধে ফ্ল’ৰিডাত খেলা দ্বিতীয়খন টী-২০ মেচত এক আকৰ্ষণীয় বিশ্ব ৰেকৰ্ড গঢ়িলে।
ৰোহিত এতিয়া টী-২০ আন্তঃৰাষ্ট্ৰীয় ক্ৰিকেটত সৰ্বাধিক ছয় কোবোৱা বেটছমেন ৰূপে পৰিগণিত হ’ল। এই ৰেকৰ্ডৰ বাবে ৰোহিতক প্ৰয়োজন আছিল দুটা ছয়ৰ।
৪ আগষ্ট অৰ্থাৎ দেওবাৰে অনুষ্ঠিত মেচখনত ৰোহিতে তিনিটা ছয় কোবোৱাৰ লগে লগে সৰ্বাধিক ছয় কোবোৱাৰ অনবদ্য ৰেকৰ্ডৰ অধিকাৰী হয়। এতিয়া টী-২০ আন্তঃৰাষ্ট্ৰীয় ক্ৰিকেটত ১০৭টা ছয়েৰে শীৰ্ষত আছে ৰোহিত।
ৰোহিতৰ পূৰ্বে এই ৰেকৰ্ড আছিল ৱেষ্ট ইণ্ডিজৰ বিস্ফোৰক বাওঁহতীয়া অপেনিং বেটছমেন ক্ৰিছ গেইলৰ নামত। এতিয়া এই তালিকাৰ দ্বিতীয় স্থানত ক্ৰিছ গেইল আৰু তৃতীয় স্থানত আছে নিউজিলেণ্ডৰ অপেনিং বেটছমেন মাৰ্টিন গুপটিল।
টী-২০ ক্ৰিকেটত ক্ৰিছ গেইলৰ ১০৫টা আৰু গুপটিলৰ নামত আছে ১০৩টা ছয় কোবোৱাৰ ৰেকৰ্ড।
সৰ্বাধিক ছয় কোবোৱাৰ উপৰি টি-২০ ক্ৰিকেটত ৰোহিতৰ নামত আছে সৰ্বাধিক ৰানৰো ৰেকৰ্ড। ভাৰতৰ এইগৰাকী বিস্ফোৰক অপেনাৰে ৯৬খন মেচৰ ৮৮টা ইনিংছত ৩২.৭২ গড় হিচাপত সংগ্ৰহ কৰিছে ২৪০০ ৰান।
উল্লেখ্য যে ক্ৰিকেটৰ আটাইতকৈ ছুটি সংস্কৰণৰ ফৰ্মেটটোত ২৪০০ ৰানৰ সীমা অতিক্ৰম কৰা ৰোহিত হৈছে প্ৰথম ক্ৰিকেটাৰ। টি-২০ ক্ৰিকেটত এই পৰ্যন্ত ৰোহিতে ৪টা শতক আৰু ১৭টা অৰ্ধশতক অৰ্জন কৰিছে।
