দশেৰাত ৰাৱণ বধৰ যোগেদি দুষ্টৰ দমন আৰু শিষ্টৰ পালন উদযাপন কৰা হয়। কিন্তু সেই দিনটোতে দুষ্টসকলৰ পৰা ৰক্ষা নপৰিল এগৰাকী কিশোৰী। জঘন্য নিৰ্যাতনৰ বলি হ’ল নাবালিকা।
তেলেংগানাৰ সিদ্ধিপেট জিলাত দশেৰাৰ দিনা এগৰাকী ১৫ বছৰীয়া কিশোৰীক দলবদ্ধ ধৰ্ষণৰ অভিযোগ উত্থাপন হৈছে ৭জন লোকৰ বিৰুদ্ধে। অভিযুক্তসকলৰ ভিতৰত ৩ জন নাবালক।
আৰক্ষী সূত্ৰৰ পৰা জানিব পৰা মতে, ঘটনা সংঘটিত হোৱাৰ সময়ত কিশোৰীগৰাকীৰ পিতৃ-মাতৃ পথাৰত কাম কৰিবলৈ গৈছিল। তাৰ সুযোগ লৈ অভিযুক্তসকলে কিশোৰীগৰাকীক অপহৰণ কৰি ওচৰৰ গাঁও এখনলৈ লৈ যায়। তাতেই তাইক যৌন নিৰ্যাতন চলোৱাৰ অভিযোগ উত্থাপন হৈছে। পিছদিনা ৰাতিপুৱা অভিযুক্তই কিশোৰীগৰাকীক তাইৰ গাঁৱৰ ওচৰত পেলাই থৈ যায়।
ঘৰলৈ উভতি অহাৰ পিছতে ভুক্তভোগী কিশোৰীগৰাকীয়ে সমগ্ৰ ঘটনাটো পিতৃ-মাতৃক জনায়। তাৰ পিছতে কিশোৰীৰ পিতৃয়ে আৰক্ষীৰ কাষ চাপি এজাহাৰ দাখিল কৰে। অভিযোগৰ ভিত্তিত আৰক্ষীয়ে POCSO আইনৰ অধীনত গোচৰ ৰুজু কৰিছে। এই ঘটনাত আটাইকেইজন অভিযুক্তক গ্ৰেপ্তাৰ কৰা হৈছে। ইয়াৰে ৩ জন নাবালক।
আৰক্ষীয়ে জনোৱা মতে, অভিযুক্ত কেইজন তেলেংগানাৰ চেৰিয়াল চহৰ আৰু ধুলমিট্টা গাঁৱৰ বাসিন্দা। ঘটনাৰ তদন্ত আৰম্ভ কৰা হৈছে। ঘটনা সন্দৰ্ভত অধিক সবিশেষ তথ্য অপেক্ষা কৰিছে আৰক্ষীয়ে।
