ৰাজ্যসভাৰ পৰা পদত্যাগ কৰাৰ পাছত গোটেই দিনটো আশাৰে বাট চাই অৱশেষত কিয় কংগ্ৰেছৰ পৰা পদত্যাগ কৰিলে কলিতাই?
কালি পুৱাৰ ভাগত ৰাজ্যসভাৰ পৰা পদত্যাগ কৰা অসমৰ সাংসদ ভুৱনেশ্বৰ কলিতাই অৱশেষত কংগ্ৰেছ দলো এৰিলে।
আজি কলিতাই নতুন দিল্লীত সংবাদ মাধ্যমৰ আগত নিজৰ দলত্যাগৰ বিষয়ে স্পষ্ট কৰে।
তেওঁ ৫ আগষ্টৰ সন্ধিয়া ৬ বজাত দলৰ ঊৰ্ধ্বতন কৰ্তৃপক্ষলৈ পদত্যাগ পত্ৰ প্ৰেৰণ কৰিছিল যদিও বিভিন্ন কাৰণত সংবাদ মাধ্যমৰ আগত ৰাজহুৱা কৰা নাছিল, জনালে কলিতাই।
কংগ্ৰেছ দল ত্যাগ কৰাৰ কাৰণ হিচাপে কলিতাই কয়, “কালি পুৱাৰ ভাগত ৰাজ্যসভাৰ পৰা পদত্যাগ কৰাৰ পাছত গোটেই দিনটো আশাৰে বাট চাই আছিলো মোক অন্ততঃ দলৰ ঊৰ্ধতন কৰ্তৃপক্ষৰ পৰা যোগাযোগ কৰি সুধিব কিয় ৰাজ্যসভাৰ পৰা পদত্যাগ কৰিলো? কিন্তু সন্ধিয়ালৈকে কোনেও মোৰ সৈতে যোগাযোগ নকৰিলে। গতিকে মই কালি সন্ধিয়া ৬ মান বজাত দলৰ শীৰ্ষ নেতৃত্বলৈ দলত্যাগৰ পত্ৰ প্ৰেৰণ কৰিলো।”
সাংসদ হিচাপে ৰাজ্যসভাৰ পৰা পদত্যাগ কৰা সন্দৰ্ভত কয়, “দলে মোক যি হুইপ দিছিল সেয়া সংসদত থাকিলে অমান্য কৰিব নোৱাৰিম। মই কাশ্মীৰৰ ৩৭০ ধাৰাৰ বিৰোধিতা কৰিছো। সেয়ে পদত্যাগ কৰিলো”।
আনহাতে, আজি এখন সংবাদমেলত প্ৰাক্তন মুখ্য মন্ত্ৰী তৰুণ গগৈয়ে কলিতাই বিজেপিত যোগদান কৰিব বুলি দাবী কৰিছিল। এই সন্দৰ্ভত সোধাত তেওঁ তৰুণ গগৈৰ কথাত মন্তব্য নিদিওঁ বুলি কয়। “তেওঁৰ বক্তব্যত সাধাৰণতে মই মন্তব্য নকৰোঁ।” কলিতাই কয়।
‘বিজেপিত যোগদান কৰাৰ সম্ভাৱনা আছে নেকি’ এই প্ৰশ্নৰ উত্তৰত কয়, “পৰৱৰ্তী সিদ্ধান্ত বা পথ সম্পৰ্কে এতিয়াই একো ভবা নাই। পিছৰ সময়ত জনাম।”
উল্লেখযোগ্য যে ৬৮ বছৰীয়া ভুৱনেশ্বৰ কলিতা ১৯৭২ চনৰ পৰাই কংগ্ৰেছৰ সৈতে জড়িত হৈ আছিল।
