জম্মু-কাশ্মীৰ সম্পৰ্কীয় সংবিধানৰ ৩৭০নং প্ৰবন্ধ “বাতিল” আৰু তৎপৰৱৰ্তী পৰিস্থিতিৰ বাবে বিজেপি নেতৃত্বাধীন চৰকাৰক জগৰীয়া কৰি গুৱাহাটীত বুধবাৰে ভাৰতৰ চাৰিটা কমিউনিষ্ট দলে এক প্ৰতিবাদী সমদল বাহিৰ কৰে।
জম্মু-কাশ্মীৰক “ধ্বংস কৰাৰ বিৰুদ্ধে আৰু সংবিধান ৰক্ষাৰ্থে” প্ৰতিবাদী সমদল বাহিৰ কৰা কমিউনিষ্ট দলকেইটা হৈছে চি পি আই, চি পি আই-এম, চি পি আই-এম এল আৰু আৰ চি পি আই।
প্ৰতিবাদত ভাগ লোৱা চি পি আই-এমৰ ৰাজ্যিক সম্পাদক দেৱেন ভট্টাচাৰ্য্যই কয় যে কেন্দ্ৰত বিজেপিয়ে স্বৈৰাচাৰী শাসন চলাইছে।
“যাৰ ফলত এতিয়া কাশ্মীৰ অশান্ত হৈ পৰিছে। ইণ্টাৰনেট সেৱা বন্ধ, কাশ্মীৰী নেতাক জে’লত থৈ স্বৈৰাচাৰী শাসন চলাইছে। হাজাৰ হাজাৰ সেনা মোতায়েন কৰি গণহত্যা কৰিব খুজিছে বিজেপি চৰকাৰে,” ভট্টাচাৰ্য্যই কয়৷
অনাগত সময়তো বিজেপিৰ প্ৰতিটো “স্বৈৰাচাৰী, একনায়কত্ববাদী শাসন”ৰ প্ৰতিবাদ কৰি যাম বুলিও ভট্টাচাৰ্য্যই জনায়।
