কাশ্মীৰৰ পৰা সংবিধানৰ ধাৰা ৩৭০ আৰু ৩৫ (এ) বাতিল হোৱাৰ পাছত ভাৰত-নাগা শান্তি চুক্তিত আৰু অধিক জটিলতা আহি পৰাৰ সম্ভৱনা আহি পৰিছে।
সূত্ৰৰ পৰা লাভ কৰা খবৰ অনুসৰি, এন এছ চি এন-আই এমে প্ৰধান মন্ত্ৰী নৰেন্দ্ৰ মোদীলৈ পত্ৰ লিখি নগা ৰাজনৈতিক সমস্যা সমাধানৰ ক্ষেত্ৰত চৰকাৰৰ দায়বদ্ধতাৰ প্ৰতি আশংকা ব্যক্ত কৰিছে।
এন এছ চি এনৰৰ অধ্যক্ষ কিউ টুক্কু আৰু সাধাৰণ সম্পাদক টি এইছ মুইভাৰ স্বাক্ষৰ সম্বলিত পত্ৰখনত চৰকাৰ আৰু সংগঠনটোৰ উচ্চতম পৰ্যায়ত অনুষ্ঠিত হ’বলগীয়া বৈঠকখন ৰাজ্যপালৰ স্তৰলৈ অৱনমিত কৰা হৈছে বুলিও অভিযোগ কৰা হৈছে।
বিগত ২৬ জুলাইত ৰাজ্যপাল আৰ এন ৰবিৰ সৈতে হোৱা আনুষ্ঠানিক বৈঠকত ইণ্ডো-নগা ৰাজনৈতিক সমস্যাৰ সমাধান তিনিমাহৰ ভিতৰত কৰা হ’ব বুলি দিয়া আশ্বাসত আমি সুখী হৈছো বুলিও পত্ৰখনত উল্লেখ কৰা হয়।
আনহাতে, বৈঠকত এতিয়াও পতাকা আৰু সংবিধানৰ দৰে মুখ্য বিষয়ত দুয়োপক্ষৰ মাজত সন্মতি হ’বলৈ বাকী আছে।
এন এছ চি এন-আই এমে তাৰোপৰি দেশৰ প্ৰধানমন্ত্ৰীয়ে দ্বিপাক্ষিক বৈঠকখন কোনোধৰণৰ পূৰ্ব চৰ্ত নোহোৱাকৈ তথা উচ্চ পৰ্যায়ত আৰু দেশৰ বাহিৰৰ নিৰপেক্ষ স্থানত অনুষ্ঠিত কৰা হ’ব বুলি দিয়া প্ৰতিশ্ৰুতিকো অসন্মান কৰিছে বুলি অভিযোগ কৰে।
‘‘আমি ভাৰতলৈ ভাৰতৰ প্ৰধান মন্ত্ৰীৰ আহ্বানত আহিছো আৰু দুয়োপক্ষৰ মাজত হোৱা বহুকেইখন সফল বৈঠকৰ অন্তত প্ৰধানমন্ত্ৰীৰ উপস্থিতিত ২০১৫ চনৰ ৩ আগষ্টত নাগা চুক্তিৰ ফ্ৰেম ৱৰ্কত হস্তাক্ষৰ কৰা হৈছিল’’ পত্ৰখনত এনেদৰে উল্লেখ আছে।
আনহাতে, পত্ৰখনত ৰাজ্যপালৰ পৰ্যায়লৈ বৈঠকখন অৱনমিত কৰা বাবে আচৰিত হোৱা বুলিও উল্লেখ কৰা হৈছে।
‘‘দুয়োপক্ষৰ মাজত সুদীৰ্ঘ ২২ বছৰ ধৰি চলা শান্তিমূলক আলোচনাৰ অন্তত আমি সমস্যাৰ সন্মানপূৰ্বক সমাধান বিচাৰো’’ পত্ৰত উল্লেখ কৰা হয়।
